Un studiente cubanu dinunzia a dittattura è si face arrestà...

Prima hà dumandatu perchè ùn pudia micca viaghjà per andà à vede u paisolu in Bulivia duve ellu hè mortu u Che. A sapite ciò ch'ellu hà rispostu, imbarazzatu, u ripresentante di u guvernu? Sarebbe per ragiò di securità... S'è l'inseme di l'umanità vulia viaghjà, ci serianu ingorghi ind'è l'aria è prublemi di securità per u trasportu aereu...

Eppò, s'hè interrugatu nant'à e mutivazione di a pruibizione fatta à i cubani di dorme ind'è l'ottelli di u paese è u cuntrollu di e tennulugie nove, frà quali Internet, e missaghjerie è i ciatti. Per una rivuluzione chì vulia difende a libertà di e so ghjente, quasi cinquanta anni dopu, u bilanciu hè bellu pessimu...
Al di là di e so critiche nant'à e libertà individuale, u giovane studiente s'hè interrugatu nant'à e cundizione suciale di i soi. Cumu serà chì ci volenu trè ghjorni di travagliu à un Cubanu per ch'ellu si possa cumprà...una spazzuletta per i denti!? Tamantu affare!

Fatt'è fine chì stu studiente hè statu incarceratu pocu tempu dopu u so discorsu. Eppuru, à qualchì ghjornu di l'Assemblea chì hà da sceglie i capizzoni novi di u paese, a stampa ufficiale piglia a pratesa di a mossa studientina. Ancu u granma, chì adopra di regula una rettorica anticogna per trattà di tematiche anzianotte, si n'hè cacciatu incù i discorsi prefabricati detti è intesi da u putere.
Era ora!