Marine, Papa è a turtura

Dura, dura di trattenesi…
Di prisintà a faccia liscia di u candidatu demucraticu chì tene caru à tutti.

Marine ùn hè pussuta stà. Quandu i giurnalisti l’anu stuzzicata pà e turture di a CIA, hà parlatu u sangue.

Da u bughju fondu di a so cuscenza più arcana, l’hè cullata in bocca una vampata di stintu. Ah, quelle sale bughje chì si straziavanu i beati prigiuneri di u FLN, durante a battaglia d’Algeri ! Papa, à core alegru, turturava à turturera. Oh sangula, campazione quelli tempi ! Avà, o monsieur, capite, ùn ci hè più cà manzette, vizzette è omi chì parenu dunnarelle.

Sciuttati, drugati, omosessuali è robba di forca !

Allora ch’ella sia detta, ricurdemu dui pruverbii chì parenu adatti in què a situazione, per insignà u razzinu è l’amore fidu chì corre trà babbu è figliola :

- Chì di ghjallina nasce, in terra ruspa.
- Da u legnu sorte u steccu.
- Tal calzu, tal magliolu, tal babbu tal figliolu.

Infine, pè iss’ultimu, ci vularia à infiminì l’ultima parolla…
Cara, Marine di Papa !