Sì face minà è diventa intelligente

È sì a viulenza era ghjuviticcia pè u cerbellu ? L'omu hè americanu, hà 43 anni è si chjama Jason Padgett. L'hè accaduta una storia chì ci hè cuntata da u New York Post.

Simu in u 2002. Tandu Jason porta i capelli longhi nant'à u tupezzu, u mullet. À a surtita d'un bar, dop'à un karaoké, si face tichjà di colpi (ùn si sà perchè, nè ciò ch'ellu hà cantatu). A cazzuttata hè viulente è casca seccu, incuscente.

Ma subbitu dopu, diventa un geniu di e matematiche. Hà sviluppatu una capacità tremenda à analizà. Vede figure geomètriche in ogni locu. U colpu hà discitatu una parte di u so cerbellu chì era adrumintata.

Si chjama u "sindroma di u sapiente" (francese " syndrome du savant "). Hè ciò chì tocca l'eroe di u filmu Rain Man, ci dice l'articulu.

L'anzianu rivinderolu in un magazinu di mòbuli hè diventatu matemàticu.

Bon, attenzione, ùn vale a pena di piglià i vostri figlioli à pattoni per fà cresce a so media in matematiche. E lesioni di u cerbellu sò à una grande magiurità gattive è periculose. Chì una cumuzione cerebrale fessi nasce u sindrome di u sapiente ind'è un omu hè qualcosa d'ancu più raru.

Ma hè sigura chì nant'à certi, valeria u colpu di pruvà.