I Catalani volenu sbattizà a "Plaça d'Espanya" di Barcellona in "Plaça David Bowie"

I Catalani sò forse appena stufi di vede una di e piazze di Barcellona chjamassi "piazza di Spagna". È cum'elli sò dinù colmi di tristezza dapoi a morte di David Bowie, hè stata lanciata una petizione per ch'ellu sia scambiatu u nome in "Plaça David Bowie".

Bon, hè dinù una risposta à a petizione "per scambià u nome di a Piazza di Spagna in Piazza Artur Mas", di u nome di u lider indipendentistu catalanu.

Hè appena cum'è sì i Bastiacci dumandavanu u scambiamentu di a Piazza Santu Niculà in "Piazza Gilles Simeoni". Appena và bè, ma ùn ci vole micca à deccunà non più.

Ma in Corsica allora, chì puderiamu scambià cum'è nomi ?

Saria forse ora di sbattizà i carrughji "rue Marbeuf" di Carghjese è a "rue Comte Marbeuf" d'Aiacciu (sapete, quellu chì hà "pacificatu" a Corsica).

Chì fà di i numerosi lochi di Corsica chì rendenu omagiu à Clémenceau ? Hè u simpàticu Georges chì avia lanciatu : "la solution au problème corse ? Cinq minutes d'immersion totale".

In quant'à quellu di a "rue Alsace Lorraine", ci dumandemu ciò ch'ellu face in Calvi.

Bon, dopu ci firmanu unepochi di "café de France" appena da per tuttu, è centinaie di nomi goffi di residenze è di lotissements.

Allora perchè micca principià cù un carrughju David Bowie ?