Tutti barbuti

"Gardons nos barbes, jusqu'à ce que la Belgique se relève !" Hè ciò ch'ellu prupostu u cumediante Benoît Poelvoorde in una videò chì hà fattu u giru di i media. Ci vole à dì chì a situazione hè pèssima in Bèlgica induve ùn ci hè più guvernu dapoi... sette mesi.

Allora perchè micca fà listessu in Corsica ? Lasciassi cresce a barba di a sulidarità ! Cum'è Poelvoorde : "laissez pousser votre barbe pour montrer que vous êtes solidaire".

Ind'è noi l'eletti ci sò, ma ùn mancanu i penseri : Ecunumia, disimpiegu, acculturazione, minacce nant'à l'ambiente, demugrafia chì schjatta, perdita d'identità, di lingua, droga, giuventù addisperata, cultura, educazione, puvertà, agricultura in perdizione... senza cuntà u Sporting in terza divisione.

Saria una bona idea... ma chì causa sceglie ? Lasciassi cresce a barba fin'tantu ch'ellu ùn ci serà più manghjeria ? Ùn più sbarbassi sin'à chì a maffia si n'andessi ? Ch'ellu ùn ci serà più droga o permessi di custruisce nant'à u liturale ? Chì i soldi pùblichi ùn anderanu più ind'e stacche di certi ? Chì a lingua corsa ùn serà micca resa obligatoria ind'e scole ?

Bon, in fine di contu, ùn hè micca siguru chì l'operazione "barba di a sulidarità" sia una bona idea...