Sempre l'orìgine corse di Kadhafi : u web si scatena

Kadhafi u corsu... Quessu u puttachju ! Cum'è prevista, u buzz face u so effettu. A videò di Bakchich hè stata vista più di 11.000 volte in trè ghjorni, è ùn ne simu ch'è à u principiu.

Un elementu fundivu di u net hè a facilità di ripruduce l'infurmazioni. Un simplice "copié-collé" hè si face u giru di u pianeta.

Cusì, l'infurmazione publicata trè ghjorni fà alimenta i blog è e cunversazioni nant'à i forum. I giurnalisti di media più prestigiosi è di più grande difusione ripiglianu anch'elli a nutizia.

Ma forse pè curciura giurnalistica, pochi facenu u sforzu d'interrugassi veramente nant'à l'infurmazione è si cuntentanu di ripiglià ciò ch'ellu dice Bakchich.

Femu una piccula rivista di web :

U giurnale Libération ripiglia l'infurmazione senza ùn purtacci nunda di novu.
Da l'altra parte di u Mediterraniu, hè listessu pè u situ Afrik.com ch'ùn porta nunda nè mancu pè u situ Lakoom.
Solu nant'à RTL un giurnalistu hà fattu u sforzu d'andà à circà a famiglia Preziosi pè dumandalli u so parè.
Ancu u JDD hà mandatu un inviatu speziale in Vizzani ma ùn ne sorte nunda di novu.

A "blugusfera" si cuntenta di ripiglià u famosu filmatu dettu "d'Alex Alessandrini in survêtement" ; fidighjate quì ma dinù quì è infine quì.

Pè compie, nant'à "Yahoo questions réponses" l'infurmazione hè cummentata nant'à u modu ridiculu.

Allora ? Veru scoop, puttachju o magagna, per avà u web ùn hà a risposta è cuntinueghja di girà in tondu...