Arrubbanu una carreia à 500 milioni d'Euri per fà corre a pulizza è discità u populu

Ch'anu fattu i militanti di Bizi ? Anu arrubbatu ottu carreie in l'agenza HSBC di Bayonne prumettendu di turnà à rendele quandu a banca turnerà à rende i milioni d'Euri scansati in Sguizzera da i so clienti.

Trè carreie nant'à ottu sò state ritrove da a pulizza ma cinque sò sempre pè ste machje. Bizi e si l'hà cunfidate à associi cum'è Attac chì cumbattenu l'onniputenze di a finanza è si pò calà nantu da spiegà à u mondu sanu chì decine o centinaie di miliarde d'Euri si svapòranu tutti l'anni per via di e cumbriccule di e sucetà offshore è di i paradisi fiscali... in lu mentre chì i servizii publichi si stringhjenu u currighjolu.

U scopu di Bizi era d'alertà i media è l'avete capita, di fà appena di rimusciu, di bolli bolli, d'effervescenza chì tuttu u mondu sappia chì HSBC imbianca i denari di i traffichi è aiuta i ricchi è semi-ricchi chì ùn volenu micca pagà l'impositi.

Un'azzione pacifica, indiata, ridicula chì tuttu u mondu pò capì è sustene, un'azzione lucale ma chì dà à riflette à tutti i citadini.

Sì, in Corsica, cum'è i nostri amichi di u Paese Bascu, andessimu à arrubà un ogettu simbòlicu à quelli ch'arrubanu i soldi pùblichi è fanne una catasta in piazza... quessa a catasta puderebbe esse altissima... Più ch'in altrò ?