A rivuluzione di e ciavatte

Eccu, Mubarak hà fattu e so valisgie è hà finitu per andassine. L'avvene di l'Egittu ferma incertu è tòrbidu, ma si ferà senza Hosni. Ùn si sà mancu chì rollu averanu i "fratelli musulmani", ma per avà si face a festa, i capatoghji veneranu dopu.

2011 hè dunque stata l'annata di a rivuluzione egizziana. Ma sapete ch'ellu hè bè di dà un nome à una rivuluzione, hè qualcosa chì ùn accade micca tutti l'anni.

Avemu dunque la Révolution des oeillets (1974, Purtugallu), la Révolution de velours (1989, Ceccoslovacchìa), a Rivuluzione di e ròsule (2003, Georgìa), a Rivuluzione Arancia (2004, Ukraina), a Rivuluzione di e tulippe (2005, Kirghistan).

Pè a Tunisìa, i giurnalisti anu datu u nome di "Révolution de Jasmin" ma sta spressione hè cuntestata.

È pè l'Egittu allora ? Si pò prupone u nome di "A Rivuluzione di i scarpi" o "di e ciavatte". Durante e manifestazioni, l'egizziani anu alzatu i so scarpi è calpighjatu i ritratti di Mubarak.

In i paesi musulmani, a sìmbolica di a ciavatta hè forte, hè segnu di disprezzu (arricurdatevi u giurnalistu chì avia tiratu i so scarpi nant'à Bush in Iraccu).

Bon, è in Corsica allora ? Si ferà a Rivuluzione di e Meindl ?