Luni 21 ghjennaghju, peghju ghjornu di l'annu

Micca laziu d'andà à travaglià, murale à zeru, azizume è fatiga ? Hè normale, rassiguratevi ùn site micca i soli.

Oghje hè u Blue Monday, u ghjornu u peghju di l'annu (ùn hè micca solu u tìtulu d'una canzona di New Order).

Si pò capisce : simu in u core di l'inguernu, e feste sò passate, i belli ghjorni sempre luntani, u fretu s'hè stallatu, e bone risuluzione digià abandunate, e ghjurnate sò corte, soldi ùn ci n'hè più. Dunque tuttu và bè, passerà.

Invece, a LFP hà inventatu u "Blue Sunday". Fendu ghjucà Bastia - Rennes in Gueugnon, hè natu u macciu u più deprimante di l'annu :

- partita in dumenica dopu meziornu
- neve, fretu è ballò aranciu
- a cità sinistra di Gueugnon cù e so usine viote delucalizate da Lakshmi Mittal
- u stadiu Jean Laville viotu cù i so mullizzi radioattivi
- a squadra di Rennes, a più deprimante di u futbol francese dapoi 30 anni
- macciacciu goffu è disfatta di u Sporting
- puttachju fragicu di u scambiu cun Arsenal trà Thauvin è Arshavin ripigliatu da i media

Basterà nò ? Bona notte à tutti.