Patrick Bruel hà una casa in indivisione in Castagniccia

Avete avutu u trimuleghju quandu avete intesu dì chì Patrick Fiori avia da fà un discu di canzone corse ? Avete ghjestimatu quandu avete intesu chì Patrick Bruel era di a partita ?

Troppu tardi, l'affare hè fattu. Hè venutu u mumentu di scopre u clip di a ripresa di "Corsica" di Patrick Fiori feat. Patrick Bruel :

À partesi da avà, a Corsica s'hà da sparte in duie categurie : quelli chì anu da mughjà à u scandalu naziunale (Baptiste Giabiconi ne sà qualcosa...) è quelli chì truveranu chì "nò perchè ? ùn hè micca male i corci, facenu i sforzi, piantate appena di criticà !".

Un'altra categuria di ghjente truverà chì "c'est sympô et puis ça donne une chouette image de la Corse".

Bon. Ùn entreremu micca in stu dibattitu, ognunu averà a so opinione. Ma pudemu scumette chì nant'à e rete suciale, u tazzeghju hà da principià.

Allora circhemu piuttostu d'analizà u clip.

Hè normale, l'ultimi Corsi sò tutti morti in Ponte Novu. O in Ponte Leccia, ùn si sà più.

Pocu dopu ghjunghje l'altru Patrick. Hè vestutu cum'è un veru corsu : cù una beretta è un curpettu grisgiu. Iè iè, sò tutti vestuti cusì i veri Corsi.

Simu cuntenti, e fiure sò belle. Ma manca qualcosa. Induve sò i turisti cù e so serviette "Corsica" ?

Patrick Fiori hè in testa di a prucessiò. Ma tuttu vestutu di neru, chì face ? Forse u bodyguard di a sposa.

Và bè, a ghjente sò cuntenti. Si ride, si sciaccamaneghja. Ùn simu dunque micca à una manifestazione d'azezi naziunalisti o di a CGT.

Elementu novu : Patrick sorte una chjave da un inviluppu. Felicitazione ! Simu felici d'amparà ch'ellu hè pruprietariu d'una casa in Castagniccia.

Ma s'ella hè una vera casa di Castagniccia, hè chì i spartimenti ùn sò ancu fatti.

A scena dopu, Patrick pare stumacatu. Face u puntu solu nant'à a so terrazza. Ùn hà micca vista nant'à u San Petrone è mancu wifi. Si stà megliu in Portovèque.

Nisun dubbitu sta volta. Patrick hè un veru corsu viulente : entratu in casa, a prima cosa ch'ellu face hè di tuccà u fucile.

Bravu ! Eccu un omu chì ùn si vergogna micca di dì ch'ellu li piace a viulenza.

Ma serà statu dichjaratu in prefettura ? È Valls chì ne pensa ?

Miraculu ! Bruel trova a manera di buscassi una zitella in paese. Chì tippu.

Ma attenti. Avà anu da affaccassi l'azezi di u paese è ci hà da nasce una cazzuttata.

Ecculi. Parenu decisi à mette una concia à un Patrick, pocu impreme qualessu.

I spartimenti ùn sò ancu fatti, una zitella, i barbuti azezi à mezu, un vechju fucile in casa... Ci sò tutti l'elementi per una bella baruffa. Di Patrick o di Patrick, quale hà da vince ?

Ma facenu a pace. Hè custì ch'ellu hè n'importa chè. Una vera storia di famiglia nustrale finisce à u megliu in tribunale.

Bruel dà a chjave di a so casa à a giuvanotta. Perchè ? Averà rinunziatu à a so parte ? N'hà vistu abbastanza cusì, piglia u so 4x4 è si ne rifala in piaghja ?

A pace hè vultata, Patrick & Patrick si beienu un colpu inseme, hè festa in paese. È a Castagniccia hè verde : u cynips hà persu, i castagni sò salvi.

Ùn hè bella a vita ?

Iè, a sapemu chì in Corsica ùn ci vole micca à parlà male di Patrick Bruel. I so fans sò numerosi è speremu ch'elli ci parduneranu.

Ma bon, postu ch'ellu ùn ci vole più à parlà di pulitica, noi rendemu omagiu à Patrick Fiori è Patrick Bruel chì omancu ci danu l'occasione di fà un articulu.

Eppo aspettemu a seguita cun impazienza. In u so prussimu clip, ampareremu cumu Patrick Fiori (chì s'hè compru un 4x4 cù a so prima à a vacca) hà da fà a pace cù u so vicinu chì tene i porci chì sò passati è chì anu arruvinatu u so ortu.

To be continued...