Cumu salvà l’ospidali nustrali in quattru è trè sette

1/ Chì ognunu fessi un sforzu per esse appena di più malatu

Diventà imbambuccitu, stroppiu o depressivu. L’occasioni di ritruvassi nant’à un lettu di l’Assitenza Pùblica ùn mancanu : stamburizzà à a porta d’un maffiosu da dumandà a prutezzione di u liturale, ingolle una fetta di pulenda industriale cù una Vache-qui-rit, imprestà una pistola à un zitellu, cunduce briacu merzu...

2/ U selfinacciu

Apre un serviziu pupulare di radiugrafia in selfie, scanner in selfie, IRM in selfie, da seduce a giuventù chì puderà mandà millaie di mortesecche « duck face » nant’à Snapchat !

3/ Fassi operà o ammuzzà pè nunda

Cusì pè u piacè, pè a bellezza di u gestu, ch’ella crescessi l’attività di i chirurgichi. S’omu cerca, òrgani o membre inùtuli, ci n’hè parechji : l’orechje di i prugrammadori di NRJ, e ghjambe di i geek, u cerbellu di u mo cugnatu...

4/ Dumandà à u persunnale ospidalieru di travaglià di manere sulidaria è participativa

Fà una chjama pè ficcà una sciringa, un'operata pè purtà un brancale, esse vinti intornu à u lettu d’un disgraziatu chì hà chersu un bichjeru d’acqua...

Aiò, tutti, operai tronchjuli è paisani sgalabati hè venuta l’ora di furbisce falce è martellu è di ritruvassi à l’urgenze.