È avà, eccu i "gendarmi pedagògichi"

Sarkozy l'avia prevenuta, a guerra contr'à l'insecurità stradale serà terribule. A lege s'hè rinfurzata contr'à quelli chì ùn rispettanu u codice di a strada è i punti nant'à u permessu saltanu di più in più in furia. Per quessa, u guvernu ùn manca d'idee.

Dopu à l'annunziu di Claude Guéant di a stallazione di " radars pédagogiques " nant'à e nostre strade, un altru prugettu serà forse messu in ballu : i falsi gendarmi in cartone, detti "gendarmes pédagogiques".

L'idea hè sèmplice : invece di mandà veri gendarmi pè cuntrullà a vitezza di e vitture nant'à a strada, si mettenu falsi gendarmi di taglia reale. Da luntanu, l'automobilisti ùn vedenu nunda è calanu a vitezza, pensendu ch'elli sò veri.

È quelli chì ghjunghjenu in faccia facenu i segni cù i so lumi pè prevene ch'elli ci sò i flicchi. Iè, nunda ch'è cun "l'appels de phares" si face calà a vitezza, senza fà spese supplementarie pè u Statu. In tempu di crisa è riduzzione di funziunarii, ci vulia à pensacci.

In Bastia i pulizzeri eranu chjamati "a pulizza gobba". Avà ci vulerà à dì "a pulizza gobba in cartone".