Chì avvene pè i nostri ronds-points ?

Simu in u 2008. Arricurdatevi, A Piazzetta lanciava u cuncorsu di u più bellu giratoghju di Natale. I lettori avianu vutatu in u 2008 per quellu di Furiani. U titulu hè statu persu l'annu dopu cù una vittoria tremenda di U Borgu.

Ci vole à dì chì dapoi parechji anni, a decurazione di u giratoghju di Natale hè diventata un veru fenòmenu di sucetà in Corsica. Sò parechji à aspettalla. In segretu l'eletti volenu chì u soiu sia più bellu ch'è quellu di u vicinu. Certi ci portanu i zitelli per fà i ritratti. À tal puntu ch'ellu ci vole ancu à falli surveglià a notte per chì i ladri è i vàndali ùn s'attacchinu à e ghirlande è i papa-noël in caucciù.

L'azezi diceranu ch'ellu hè "un Disneyland du pauvre". I bravi ch'ellu ci arrega appena di a magìa di Natale. U contrapartitu dumanda quant'ellu costa è parla di soldi spulati.

Quist'annu torna ùn mancanu e decurazione.

Ma quist'annu i curpetti gialli anu inventatu qualcosa di novu : u rond-point cuntestatariu. L'occupazione di i giratoghji dapoi u principiu di u muvimentu hè diventatu un sìmbulu.

Parigi si scorda di a Francia periferica, quella chì hè luntana da u putere ? Chjodenu i servizii publichi chjodenu, cresce a puvertà è u sintimu d'abandonu ? Femuci sente occupendu u giratoghju.

Ridite ? È purtantu nasce ancu una fraternizazione à traversu i giratoghji in lotta.

Spessu disprezzati, i curpetti gialli anu inventatu u rond-point militante.

È quessa, i Corsi ùn ci avianu mai pensatu !

Allora riflettimu una cria à ciò ch'elli puderianu diventà i numerosi giratoghji corsi, chì in generale sò goffi è chì ùn ghjovanu à nunda.

U giratoghju puderia diventà ogni dumenicata un locu d'addunita, di dibattitu, di cuntestazione, di rivolta. A Corsica era paisana, oghje diventa periurbana. I centri di e cità si viotanu, i centri cummerciali in periferia crescenu. A Corsica s'hè baleonizata. U rond-point hè diventatu u centru di u mondu novu.

Parechje cumune di Francia ci anu pensatu : perchè micca trasfurmà u giratoghju in ortu ? Bio di siguru.

L'ape ùn si portanu tantu bè. Hè una catastrofa è a sapete. Tandu, perchè micca stallà bugne nant'à i giratoghji ? Quì dinù l'esempii ùn mancanu in parechje cumune.

Ritrattu : jipai.over-blog.com

Hè menu bellu ch'è un ortu, ma pò esse utile ancu quessu quì. U ritrattu hè statu pigliatu in Italia, pruvincia di Verona.

E vacche di Lupinu pensavanu di truvà l'arba fresca, anu trovu u cimentu.

Ritrattu Facebook Olivier Collard

Un'idea per l'eletti chì anu a furtuna d'avè un bellu olivu nant'à un giratoghju : è s'ellu si facia una racolta di l'olive per fanne oliu ?

Mascone dicia in i spettaculi chì in Corsica si facia un rond-point quand'ellu c'era un prublema. "Et comme ça la Corse elle tourne en rond". Hè ora di fanne qualcosa di tutti sti giratoghji. Aiò !