Avemu infine ritruvatu i Tchao

S'è vo site à pocu pressu normale, i "Tcha'o" sò assuciati à u vesperinu di a vostra zitellina (iè hè parolla corsa per dì "le goûter") è à e Mystérieuses cités d'Or, di Ulysse 31 o di Fraggle Rock nanz'à u Corsica Sera presentatu da Jacques Bastianesi.

Hè vera o nò ? Bon.

Sti biscotti tondi à a cicculata sò cum'è i "Princes" d'oghje, ma in megliu.

Certi i chjamavanu sempre "Bichoco", ancu si stu nome ùn esistia più dapoi dece anni.

Un Misteru
Ma c'era un veru misteru nant'à i Tcha'o. À l'epica di a nostalgia di l'anni 80, publicità, ghjochi, prugrammi tv è altri, ùn si truvava nunda nant'à l'esistenza di sti biscotti. Ùn si sà quale hè chì l'hà fatti. BN ? Lu ? L'Alsacienne ?

Una legenda dice ancu chì i Tcha'o ùn sarianu stati ch'è una marca destinata à u mercatu corsu.

SOS Tchao
Nant'à u web ùn mancanu i messagi nant'à i forums in ricerca di Tchao : da vede quì, o ancu quì, è dinù quì... è ci n'hè pienu di discussioni cusì.

Eri sera nant'à Twitter, un internautu @DagostinoY hà publicatu un vechju ritrattu d'un pacchettu di Tcha'o. Bon ok u ritrattu ùn hè micca di qualità. Ma hè tuttu ciò ch'ellu si pò truvà oghje, è hè guasi un miràculu.

Ùn vi pare nunda ?

Nò. Ma per noi hè assai. Ch'ellu ne sia ringraziatu !