Attenti, ghjunghje u "paléo-fitness"

Avvicinassi di a natura, vultà à appena di più di simplicità, sbarazzassi di ciò chì ùn ghjova à nunda... U prugramma hè interessante è ùn face male, ma tucchemu à e so limite.

Hè natu un sport novu, u "paléo fitness", chjamatu dinù "gym des cavernes". Sta disciplina nata in Francia hè face riferenza à u paleuliticu.

A regula : movesi cum'è un omu di Cro-Magnon, saltà nant'à i scogli, trascinà fusti d'arburi è petronculi, corre cum'è una scimia...

Un bellu prugrama in perspettiva.

Ùn avemu nisuna prova chì i nostri antichi prestorichi facianu quessa, ma perchè micca.

Bon averete capitu, sta pazzia ùn sterà tantu à vene in Corsica. Ci ne serà sempre unu pè inventà u "Cuccuruzzu fitness", a "Filitosa gym" o a "spassighjata neulitica" cù una mansa di scimie ecchippati di lampane fruntale in traccia di corre scalzi spugliati è famiti pè i vostri carrughji. Preparatevi.