U calibru 38 contr'à a paghjella

Innò, ùn hè micca un pesciu d'aprile o una nutizia di u Gorafi. Cantà falsu in un karaoké di Manille pò custavvi una fucilata. Hà inchiestatu u giurnale Society :

Stu fenòmenu chì cuncilia a passione accanita di u cantu è quella di l'arme puderia ancu ghjunghje in Corsica.

Si pò imaginà a serata.

I giuvanotti sò à u cuntuaru, beienu « Giddy Geischa » (saké è altre sustanze), « Sex on the beach » (vodka è chì ne sò eiu) o « Scimia Muntagnola » (cinquant'unu è acqua fresca). E giuvanotte, scantate, si beienu u Coca (bolle è caramellu) è a si chjachjeraghjanu.

Mumentu datu, un maschju caccia a ghitara, si mette à tuccà, è allè, intona una canzona, « Fideghja u to fratellu, li stringhje una catena », seguitatu da un coru maschile in pumpetta chì si sfoga « da fà un frombu...FROMBU...FROMBU... ».

Per avà tuttu và bè. E giuvanotte ghjocanu sempre cù u telefuninu è ciarlanu senza appinzà l'arechje.

Ma ùn trica tantu à svegliàssi a brama nustrale di u cantu in trè « O fratè, abboccati, aiò... ci femu una paghjella ». Nimu si face precurà.

Attacca a seconda « O culomba le to labbre... » u bassu, sgrunzendu u fronte, appoghja « sò di petra calamita » è a terza... chì face a terza ? A terza luppa a so entrata. S'aspettava una voce latina chì sguillissi altu in celu è si face sente una vuciaccia fora di tonu.

Ghjè custì chì a serata s'imballa : una di e donne lenta a so sigaretta machjata di rossu à labbre, agguanta u 38 ch'ella avia in lu sacchettu è... pabbà !

Ùn ci vole micca à tuccà à u versu nustrale.

Sì vo site più vicinu di Assurancetourix, u barde di u paese d'Asterix, ch'è di Petru Guelfucci, alluntanatevi di i cuntuari è fughjite dinù i karaoké di Manille.