S'ellu fussi statu corsu...

S’ellu fussi statu Corsu… William Wallace ?

Ellu sì chì ci hè riesciutu à lampà fora di casa u nemicu ! Ellu sì, l’eroe liberatore di a Scozzia di pettu à u culunizatore Inglese ! Un certu Pasquale di Morosaglia ci serebbe vulsutu ch’ellu andessi quallà, ind’è i Scuzzesi, à struìscesi. Tandu, in Ponte Novu, a chjibba a sciaccàvamu noi è a Storia ùn era più quella, ma aù… Chì furdanu ! Hè capita ch’ella era più bella à scialàssila in Napuli, sottu à u sole è vicinu à u mare. Pfff ! O Pasquà i to soldi…

S’ellu fussi statu Corsu… Gandhi ?

L’avianu i molli tutte e sere à manghjà in casa. Bon’, hè vera chì cù una chigna cusì, ùn averebbe pussutu falà a Traversa senza buscassi panette è scapochji. Ma cacciatu quessa u tippu a li sciaccava da veru ! I truverete voi ind’è noi ghjente chì ci la fàcenu à scioglie i cunflitti è e baruffe senza fà usu di a viulenza. Mi dicerete chì un tippu, vegetarianu, maestru di a siesta, di a meditazione è di u dighjunu ùn la pò avè a forza per parte in prima ligna. Noi chì ci tichjemu da mane à a sera di lonzu è figatellu, chì pensemu poch’è micca è chì c’ingullimu pastizzu à botte piene, hè nurmale chì ogni tantu ci colli u sangue in capu. Innò, in fin di conti, u Gandhi Corsu ùn pò esiste. Eppo cù Gandhi è senza Fronte, cumu fecìanu à EuroBazar per francàssila senza vende tutti sti treillis ? Ci vole à pensà à l’impieghi dinù !

S’ellu fussi statu Corsu… Diego Maradona ?

Nò hè ghjustu chì serebbe propiu a grossa grossa classa…

S’ellu fussi statu Corsu… Ghjesucristu ?

Quessa dinù serebbe stata bè ma tandu o ghjente e storie per sapè di chì paese Corsu serebbe surtitu è induve averebbe avutu à finisce. Chì serèbbenu stati u Bethleemme è a Ghjerusalemme Corsa ? Ùn sò micca troppu per a nàscita, ma per a morte eiu dicu Bustànicu. Ùn mi dumandate perchè, ùn la sò manch’eiu. Ma esse crucifissatu in Bustànicu deve esse propiu penìbbule.

S’ellu fussi statu Corsu… Christian Clavier ?

Nò aiò, ùn ci vole micca à deccunà quantunque ! ‘ntite què a faccia ! Chignacce cusì ùn ponu esse Corse. Ùn ci possu resiste, vi sciaccu a spiegazione scentìfica ch’ellu dà Marcu Biancarelli ind’è Stremu Miridianu :« … basta ad apra l’ochja par sapè chì nisciun’ Corsu ùn hà da mai da risembrà à ‘ssa criatura quì (un pinzutu à u comptoir). U sìmpliciu studiu di i facci, iè, un beddu studiu razzistu dimustraria u fiumu gèneticu chì curri da no à iddi. Certi semu carchi à vilenu, semu gattivi, ma o mancu, t’emu i facci chì parini umani. ».
Àme.

S’ellu fussi statu Corsu… Charles de Gaulle ?

U Generale Fran…

Eppo innò, vechje coglie n’avemu digià abbastanza in Còrsica.

S’ella fussi stata Corsa... A pizza ?

Cara ! Serìamu propiu carc’à soldi. Eppo a saperìamu fà appena megliu o mancu, è ùn ci abbuchjerèbbemu micca ste pizzacce di fin’di serata pè stu Mercà.

O s’ella era Corsa a pizza…

S’elli fussinu stati Corsi… Stone & Charden ?

Aiò basta avà e cunnerìe !

Emu digià u nostru chì fà à suppurtà i Mantini…

S’ellu fussi statu Corsu... Emile Zuccarelli ?

O s’ellu era statu Corsu quessu. S’ellu era discendente di una famiglia di ceppu Corsu. S’ellu era surtitu di un paese di u Mercòriu per esempiu, un locu bè arradicatu à a nostra Còrsica prufonda, s’è u corsu u sapìa parlà, è chì a nostra cultura a cunniscissi, s’è a paghjella a sapia fà… Tandu ùn serebbe micca statu cusì oppostu tutta a so santa vita à u sviluppu di a so lingua è à a ricunniscenza di u so pòpulu. S’è in più di quessa era statu di manca allora ùn si ne parli mancu !