Riscaldamentu climaticu è cullata di l'acqua : cumu serà a Corsica in u 2100 ?

L'idrobiologistu Antoine Orsini spiegava qualchì mese fà chì in u 2050 Bastia averà u clima di a Tunisia è chì l'acqua si faria di più in più rara. Da leghje in Corse-Matin :

Allora s'è vo site inchieti ùn andate micca à vede sta carta interrativa chì permette di fassi un'idea di ciò ch'ellu serà u mondu cù a crescita di u livellu di u mare.

Ramintemu chì l'ipotesi a più pessimista di i spezialisti di u GIEC (Groupe d'experts intergouvernemental sur l'évolution du climat) prevede una crescita di e timperature di quattru gradi.

Per i scentifichi di "Climate Central", quattru gradi in più currispondenu à una crescita di u livellu di u mare di 8,9 metri.

Forse hè una visione troppu pessimista. Ma per avà a tendenza ùn hè micca à a calata di e timperature...

Climate Central hà dunque fattu una carte interrativa per fassi un'idea di ciò ch'ellu puderà esse.

Nant'à u Spassimare si spasseghjanu i granci. A piaghja chì và da Bastia à U Borgu serà pè i pesci. San Fiurenzu è l'aeroportu di Puretta dinù.

E terre agrìcule di a piaghja sò sott'à l'acqua. Ma u situ anticu d'Aleria hè priservatu. Eranu forti sti Rumani.

Custì sò numerose e "villas-les-pieds-dans-l'eau".

Chì avvene pè l'Atrium ?

Bella sigura, ùn hè ch'è un'ipotesi è i scentifichi ùn sò micca tutti d'accordu. Ma puru sì u mare cresce "solu" d'un metru, u liturale corsu ùn serà micca u listessu ch'è quellu d'oghje.