Rientrata è rinfriscata

U tempacciu v'impedisce d'andà à u mare è ùn sapete chì fà ? Allora ùn andate micca in i centri cummerciali.

Di sti tempi, e nostre amiche e "grandes surfaces" ci danu l'affanu.

Quallà, l'assassini chì s'occupanu di i "rayons" anu decisu di caccià tuttu ciò chì face riferenza à l'estate per mette a rubbaccia di a rientrata.

Addiu serviette, spechjetti di sole, creme à brunzà, tongs, palme è tuba, ghjaccere è barbecue...

Ùn si trovanu più ch'è sacchi, cartine, criò, stylo bic, gomme, parka, doudounes, cunnerie "hello kitty", piloni, paracqua è robba pè a scola.

S'è vò pensavate prufittà torna appena di l'estate, l'orrore di a sucetà di cunsumazione hè quì pè ramintavvi chì à mumenti a cumedia hè finita. I sgiò Leclerc, Super U è Casino ci preparanu digià psicologicamente à affruntà l'orrore di a fine di e vacanze è di a rientrata.

È quelli chì si compranu cartine è parka d'agostu, ùn sò micca da chjode in Sant'Ornellu ?