E bone risoluzioni ch'è vò ùn piglierete micca

1. Piantà a panza : Tutti l'anni ci cridite, tutti l'anni cumprate un survêt' pour faire du sport ma à capu di duie settimane, u vostru survêt' vi ghjova solu à fidighjà à Michel Drucker o L'Equipe du Dimanche nant'à u vostru canapé. Lasciate corre, ùn ferete nè muscu, nè yoga, nè footing.

2. Piantà a sigaretta : Per quelli chì fumanu, pudete sempre pruvà a cigarette electronique per avè l'aria appena di più baullu ma ùn ghjuverà à nunda.

3. Piantà di vutà per i listessi : Quantu volte avete dettu "hè l'ultima volta ch'à votu ste narpie !" Eppo...

4. Piantà di fà u musu cù i so culleghi di travagliu : Hè talmente megliu d'esse azezu... Eppo di tutte e manere, hè a crisa è da quì à pocu ùn ci serete più à u travagliu.

5. Piantà di fà u connu à u karaoké : Svegliatevi, ùn semu più in 1994.

6. Piantà di fà u criticone : Hè talmente più faciule d'ùn fà nunda è di criticà à l'altri...

7. Piantà di manghjà n'importa chè : Sushis cù u Nutella, pizze cù i knackis, salciccia cù i Pringles... Di tutte e manere, ci ferma menu d'un annu nanzu à a fine di u mondu.

8. Piantà di perde u vostru tempu nant'à Facebook : Hè vera, saria megliu di leghje un libru, di vede un filmu o di sorte fora. Ma di tutte e manere ùn avete nunda d'altru à fà...

9. Piantà di vutà per un "figliolu di" : Micca faciule, neh ?

10. Piantà di cumprà n'importa chè : Quandu volte vi site dettu : "perchè aghju cumpratu st'affare goffu chì ùn ghjova à nunda ?" o "ma perchè aghju cumpratu tutta sta rubaccia micca bona ch'o ùn manghjeraghju mai ?". Ebbeh serà peghju in 2012.

11. Piantà di mughjà contr'à i turisti l'estate : Mancu à pensalla !

12. Piantà d'esse pessimistu : Hè a fine di u mondu, u disimpiegu, i prezzi chì collanu, Fukushima, a Grisa, u calindariu di i Mayas (è di l'Incà dinù), u riscaldamentu climàticu, u tsunamì, u "triple AAA", Mafiosa 4, l'elezzioni à vene, u petroliu, François Hollande, u PSG... basta ! Quessa a risoluzione, ci vuleria à tenela da veru !