Dop'à a suppa di musu, a suppa di plasticu

Cunnisciate a suppa di fasgioli, a suppa di pesciu, a suppa di mammone, a suppa di musu, eccu dunque a suppa di plasticu.

U Mediterraniu hè u mare induve a pulluzione à i pistìcciuli di plasticu (vi và cum'è traduzzione per "microplastiques" ?) hè a più forte di u mondu.

È figuratevi, furtunati ch'è no simu, chì a cuncentrazione a più forte di stu mullizzu in u Mediterraniu si trova in u mare Tirreniu, trà u Capicorsu è a Tuscana.

Digià ch'è no ùn ci la femu à gestisce u nostru mullizzu nant'à a terra, allora pensate appena quellu in mare...

À l'orìgine di stu ruminzulaghju marinu si trova ben'intesu l'omu, chì cunsuma troppu plasticu : ne fabrichemu 300 milione di tone à l'annu, è 10% finiscenu in mare.

Stu fenomenu ùn hè micca propiu à u Mediterraniu. In l'oceanu Pacìficu si parla di "cuntinente di plàsticu".

Un cuntinente, o un'isula, dite cum'è vo vulete. U mullizzu ùn manca.

È cum'ellu ci volenu parechji seculi per chì un pezzu di plasticu sia distruttu, n'avemu torna per una bella stonda à cuntemplà sta suppa di mullizzu.

In più d'esse particularamente goffu, stu mullizzu hè periculosu pè i cetacei, pesci, acelli, cuppulate chì ingollenu è chì morenu.

Chì lascianu a piazza à d'altre spezie.

Ma quale hè chì sà, forse chì stu mare di mullizzu hè un bè è chì un ghjornu un ponte di mullizzu ci permetterà di francà u mare per sbarcà in Italia ? Ùn si pianta u prugressu.