Chì s'hà da passà quandu a Corsica averà a so selezzione di ballò ?

A selezzione ghjucherà e so partite à Santos Manfredi, in Corti

Bastia è Aiacciu si tazzanu per accoglie e partite di a selezzione naziunale. Allora per mette tuttu u mondu d'accordu, a CTC decide di mette i macci in Corti.

Surpresi da u clima curtinese è da a vista nant'à e muntagne di u Boziu, i visitori sò destabilizati è perdenu i so mezi. A selezzione ùn perde mai in casa soia. Corti diventa u "La Paz" di u ballò aurupeanu è Santos Manfredi hè cugnumatu "A Pignatta".

Ritrattu contu Twitter di l'USC

In biancu o in neru ?

I sustenidori ùn sò micca d'accunsentu. A selezzione deve ghjucà in biancu, cum'è quella di l'anni 60 ?

Chì s'hà da passà quandu a Corsica averà a so selezzione di ballò ?

O in neru, cum'è a Squadra Corsa ?

In fine di contu, Gilles Simeoni per fà piacè à tuttu u mondu decide di ghjucà cù una maglia nera è bianca, à l'usu a Juventus.

Tuttu u mondu trova què strasordinariu è Gilles Simeoni hè turnatu à esse elettu nunda ch'è per quessa.

Paul Giacobbi diventa presidente di a Federazione Corsa di Futbol

A Corsica ùn hè micca ricunnisciuta da l'ONU (tuttu u mondu si n'impippa), ma da a FIFA, sì ! Paul Giacobbi (chì hà arrestatu a pulitica) diventa u capimachja di a Federazione Corsa di Futbol. Diventa l'amicu di Michel Platini chì passa e so vacanze in Venacu.

Chì selezziunadore ?

Dop'à un record di 17 macciacci finiti nant'à u risultatu di zeru à zeru, Jean-Michel Cavalli hè messu fora. Parechji candidati si presentanu : Claude Leroy, Philippe Troussier, Raymond Domenech, Hervé Renard. Ma surpresa : hè Jean-Guy Talamoni chì hè sceltu pè u postu. Prima decisione : pruibisce e cuppe di capelli goffi è e ciuffe ridicule di i futbalori.

Whabi Khazri sceglie di ghjucà pè a Corsica

A FIFA autorizeghja Whabi Khazri (chì hè natu in Aiacciu) à purtà a maglia di a Corsica. Mette un hat-trick per a so prima selezzione. Brandao chì s'hè fattu naturalizà corsu ghjoca anch'ellu.

Prima vittoria cont'à l'Azerbaigian

Bon d'accordu, a squadra di Corsica ùn hè micca peghju ch'è l'Andorra o San Marinu. Ma quantunque, si piglia unepoche di chjibe. Finalmente, a prima vittoria intervene contr'à l'Azerbaigian, è pare ch'è no avessimu vintu a cuppa di u mondu.

Appena cum'è què :

Gilles Simeoni stabilisce 3 ghjorni di festa è hè turnatu à esse elettu nunda ch'è per quessa.

I dui Patricchi cumponenu l'innu di a selezzione corsa

Dop'à stu successu tremendu, Patrick Fiori è Patrick Bruel scrivenu una canzona in omagiu à a squadra naziunale. Si chjama "Compagnons" è ripiglia l'aria di "Compañero".