Chì ci hè di novu à a legione ?

A sapiate chì Bernard Tapie era passiunatu di "La 7ème compagnie" ? O forse serà Roger Antech ?

Dapoi una settimana, ùn si passa un ghjornu senza chì Corse-Matin fessi un articulu nant'à a legione. È s'ella ùn hè a legione, hè l'armata.

Avemu fattu u contu :

27 aprile, pagine di Corti : "Célébration du 150ème anniversaire de la bataille de Camerone" (simu cuntenti per elli)
28 aprile, pagine di Corti : intervista di u giovanu colonel Mougin, anzianu capimachja di a legione di Corti è ardente difensore di l'università di Corsica : "la légion reste ma deuxième famille".
29 aprile, pagine di Calvi : "150 ans plus tard, le mythe de Camerone perdure" (è dalli)
30 aprile, pagine di Sartè : una pagina sana di prumuzione pè l'armata "les jeunes à la découverte de l'armée de l'air" (anu avutu a scelta ?). Ma ferma una piccula piazza pè a cultura postu ch'elli si vedenu canta i picculi suldati chì parteranu forse à fassi splusà in Afganistanu cù stu cummentu : "au moment d'interpréter la Marseillaise, sérieux de rigueur".
1u di maghju : ancu di grazia, ùn si travaglia micca...
2 di maghju : ripresa in fanfara cùn stu tìtulu originale : "Le 2ème Rep fête les 150 ans de Camerone" (casu mai n'avete ancu capitu).

Parechje dumande si ponenu à noi dop'à sta settimana di frenesia militare :
- I giurnalisti di Corse-Matin sò à stu puntu militaristi ?
- O forse serà Roger Antech chì si disceta a matina à u sonu di "Tiens voilà du boudin" è dopu si fideghja u DVD à u ralentì di La légion saute sur Kolwezi ?
- Averemu un ghjornu un drapeau français è un képi cù u supplementu di u venneri ?
- In un epica di viulenza sfrenata, chì pensà di sta dimustrazione di forza, di garde à vous, di sfilati militari, di mitragliose belle luccicante è mustrate cun orgogliu ?

Ma quessa a viulenza hè viulenza chic. Hè viulenza autorizata.

O sinnò, è s'ellu si parlava appena in stu giurnale di cultura, di storia, di literatura, d'archeologia, d'ambiu, di paesi, d'iniziative pusitive di a ghjente di stu populu, chì forse ne ponu parlà in bè ? Iè, ci n'hè sempre appena. O sinnò l'archeologhi di u futuru risicheghjanu di pensà, leghjendu à Corse-Matin, chè no eramu un populu di legiunari.

Pè un articulu in lingua corsa in Corse-Matin è pè i nomi di lochi scritti di manera curretta, aspettemu sempre. Ùn face chè quarant'anni chè no l'aspettemu.

Bon, di manera più seria, i giurnalisti anu l'ordine di fà a prumuzione di l'armata cusì ?

In quant'à l'episodiu di i pastori Saveriu è Pasquinu Ruggieri di Bustanicu assassinati da un legiunariu disertore in u 1976, ùn ci vole micca à parlane.