Alain Orsoni, cum'è s'ellu ùn ci fussi statu nunda...

U Bernard Tapie corsu

Hè u nostru Bernard Tapie corsu, Alanu Orsoni. Piacenu i dui à e donne. Ùn era cugnumatu "le bel Alain"? Tramindui, anu fattu a pulitica. Unu à manca è l'altru incù i naziunalisti. Anu fattu i so affari dinù. Sò ancu stati presidenti d'una squadra di ballò. L'OM per u prima è l'ACA per u secondu. Sopratuttu, sò sempre duve omu ùn s'aspetta à scuntrà li...

U primu, dopu parechji anni d'esercitu in pulitica à manca, à u PRG, à fiancu à François Mitterrand, s'hè lampatu in una carriera d'attore in un scumpientu di seria B : "Commissaire Valence". Megliu, Tapie a frittella hà palisatu di modu publicu u so sustegnu à Sarkozy... Ancu megliu, hà vintu a simana passata 240 milioni d'€ dopu l'affare Adidas/Crédit Lyonnais... Ne vulete soldi?

Aleria, u FLNC...

U secondu, Alain Orsoni, hà avutu un principiu di carriera impegnata in u militantisimu naziunalistu. Ci hè da chì fà sunnià ancu i più rumantichi! Dopu a CSC è Aleria duve Léo Battesti li dumanda di vene, entre à u FLNC. Hè statu l'ultimu prigiuneru puliticu cappiatu dopu à l'amnistia di u 1981. L'assassiniu di u so fratellu Guy Orsoni li dà una fama tremenda. In piena epica Broussard, diventa u fratellu di a vittima di u "statu francese assassinu". Dopu a vindetta di a prigiò d'Aiacciu, serà ancu chjappu per apulugia d'assassiniu... Pianu pianu, a face à piglià a suprana nant'à Pierrot Poggioli è diventa u capimachja di i machjaghjoli... Rispunsevule di u settore V, incaricatu di racoglie l'impositu revuluziunariu, i soldi li facenu girà u capu...

...e pizzerie è a guerra trà naziunalisti

Cum'è Bernard Tapie, vole esse patrone. Serà patrone! Micca d'Adidas nò, ma di pizzerie è di discutecche... Sò l'omi di a so leva, i so anziani fratelli di lotta, bravi omi cum'è François Santoni, Gilbert Casanova, Charles Pieri, Etienne Lovisi è tant'altri dinù chì affondanu tandu u naziunalisimu in una guerra scema senza sensu.

U cuniscite à Alain Orsoni?

Di a guerra trà i naziunalisti, s'è i principali attori sò rivenuti à nantu, per contu soiu, ghjè acqua in bocca. Si presenta cum'è s'ellu ùn ci fussi statu nunda, cum'è un omu pulitu, un scalatu, quasi cum'è un furesteru. Malgratu i so ochji spampilullenti è u so sguardu di crooner, à l'usu George Clooney, Frank Sinatra o Michel Leeb, ùn ci vole micca scurdà si di i danni ch'ellu hà fattu à a Corsica. Quantu ci n'hè stati morti da a parte di u MPA o di a Cuncolta per via di e pretensione, di l'invidie, di a falsità o di e lesine d'unepochi?

U Nicaragua è a PEFACO
Certi diceranu chì ùn hè più ora di bullicà sti fatti passati o chì i morti ùn turneranu più. Hè à u cuntrariu per elli chì ci vole à ramintà si di e sviature passate di u naziunalisimu è per noi, avà, chì ùn ci vole micca scurdà si di u CV di certi. Micca ch'o voglia cundannà à un tale o un tale, chì in quelli imbrogli, sò tutti pari, ma dopu una scappata à u Nicaragua è in Barcelona à vende machines à sous per a PEFACO, casca male di parlà di a so vuluntà di sviluppà l'associ di sustenitori aiaccini... U vidite voi in una tribuna? Si crede sempre in pulitica à purtà a ghjente di fole in canzone...

Ancu s'è l'antichi dicianu chì per cunosce à qualchissia ci vole à manghjà si un bacinu di sale cun ellu, dicianu dinù chì "u troppu stroppia"...

Da l'ACA à a CTC?

Allora s'ellu ùn hè micca presidente di l'ACA per a passione di u ballò, soca sarà ch'ella li trica di turnà à l'Assemblea di Corsica? L'elezzione sò vicine : 2010... Corre u puttachju dipoi un pezzu digià. Ancu un blog macagna ne parla, di u "Ritornu d'Alain Orsoni".

À u teatru o nant'à France 3 Picardie?

Per contu meiu, più chè à l'Assemblea di Corsica, u viderebbe piuttostu incù u Teatrinu per ghjucà à u Tartuffe di Molière. Altrimente, puderebbe presentà u tempu nant'à France 3 Picardie. Da cumedianu, sarebbe ancu capace à fà li crede chì a Picardie hè u locu u più assulanatu di Francia...