Gilles Simeoni à Matignon ?

È avà, femu a Francia ? Si parla pocu di Christian Troadec ma s'hè purtantu dichjaratu candidatu à a presidenziale... d'aprile scorsu.

Christian Quale ?

Christian Troadec hè u merre di Carhaix-Plouguer, una cumuna di u Finistère. S'hè fattu cunnosce à u mumentu di u muvimentu di i "Bonnets rouges", in u 2013.

Hè situatu à manca (si presenta sott'à l'etichetta « gauche alternative » à u cunsigliu regiunale di Brittania) ma ùn l'impedisce micca d'inzergassi contr'à u PS è Hollande. Avia chjamatu à manifestà contr'à u prugettu d'aeroportu à Notre-Dame des Landes, sustenutu da Jean-Marc Ayrault.

Ma nant'à stu puntu i cappelli rossi ùn eranu d'accordu.

Si presenta ellu stessu cum'è regiunalistu è à prò di e lingue "regiunale".

Una di e so pruposte : a suppressione di i posti di prefetti è sottu prefetti.

Hè cusì ch'ellu hè venutu à presentà u so prugramma in Corsica st'estate.

Parechji eletti corsi (micca solu naziunalisti) anu purtatu u so sustegnu à u brittonu.

Ma ci la ferà à truvà e 500 signature per esse candidatu ? Pocu fà, dicia avenne 224.

Ma per custituisce u so guvernu, à chì ne simu ? Nant'à RMC Christian Troadec hà dettu chì u so primu ministru serà... Gilles Simeoni.

Una candidatura regiunalista à a presidenziale ? Perchè micca.

A prumessa di mette à Gilles Simeoni à u postu di primu ministru ? Perchè micca. Avà chì tuttu u mondu in Corsica hè naziunalistu, li pò purtà unepochi di voti.

Ma s'ellu vince ?