San Fiurenzu, di più chè cusì !

Da puntellà i mo scritti, mi vene in quella di favvi cunnosce o ramintavvi issi pochi filari di a canzona Di più chè cusì scritta da Ghjuvanteramu Rocchi è cantata da I Muvrini in u 1984: “U mo paese o ghjente care, ùn hè solu sole è mare, hè di più chè cusì” filari da fà trimà l’esse d’ogni paisanu piaghjincu chì cunnobbe u scunquassu di a transizione di iss’ultimi decenni chì vide tanti paesi mutà versu, da lochi di stanti è di pruduzzione in lochi di sciali disassinnatu, tempii di un cunsummu sfrenatu è di u turìsimu massicciu.

Aiò ci ne nantu à a scarpata di ciò chì fù, a memoria di i lochi è data si a spulverata viderete o cari chì a làscita di l’antichi hè tesoru preziosu !

Vi portu apperlamanu nantu à a strada vechja di Santa Catalina, quella chì permettia à u bassu Medievu di fà cumbasgià u portu di Sancto Florentio è a Catedrale Santa Maria Assunta.

Accinta da u Monte Rivincu, Sant’Anghjulu è e muntagne matticciose di u Pignu è di u Zuccarellu vene scupertu issu giuvellu di l’arte rumànica, serà forse cù a so surella di a Canonica edificata in u 1116 a testimunianza a più distinta di l’arte rumànica pisana di a Corsica, ne truveremu d’altronde qualchì sumiglia da mare in là.

U primu ammentu ci vene da a certosa di Calci mette à palesu travagli trà u 1121 è u 1139.
Alzata cun petre calcinose apparichjate da e cave di Sant’Anghjulu nantu à a strada di u Poghju d’Oletta, cù u so pianu basilicale, a so navata centrale, e so duie navate laterale è u so coru compiu cù un àsside, s’impone da capidopera di suchju rumànicu pisanu.

Mi dicerete ma cumu hè ch’è vo principiate à 1 chilomètru di u centru stòricu, a risposta hè bella chjara, sarebbe stata a Catedrale alzata nantu à a famosa antica Cità di Nebbiu.
Guy Meria stòricu di u lucale l’accerta senz’altru u locu era accampatu da i rumani ed ellu c’averia trovu 2 pezze rumane (sic).

Cun cautella assai, pudemu interrugà u lettore annantu à u fattu ch’elli avessinu sceltu di alzà una Catedrale cusì luntanu da u centru oghjincu, 4 seculi prima ch’elli muressinu e prime petre di San Fiurenzu, puderia fatta fine accertà una cuntinuità trà una cità rumana è a catedrale rumanica.

Secondu u crunista Agostino Giustiniani, in a Descrizzione della Corsica, p.60 à i tempi ch’ellu impennò, a cità di "Nebbio" era ridutta in ruvine solu firmavanu una parte di a muraglia è un turrione, d’altronde ebbe ellu à dà di manu à a ricustruzzione di u palazzu vescuvile (Ver di circa 1530).

Nentru, cumparisce maestosu u Cristu Neru, crucifissu in legnu di tigliolu classificatu in u 1909 è risturatu in u 1996, era surtitu in prucessione da a Cunfraterna Santa Croce vechja in tempi di sicchina, usu abbandunatu versu u 1877, sarebbe ora di caccià lu neh ?

Fatta si issa bella scuperta patrimuniale, si pò avvià omu versu u locu chjamatu San Roccu, ci s’infatta l’àsside mezu circulare di una cappella rumanica urientata Nordu Levante è a basa di a muratura laterale, secondu à a ben di Geneviève Moracchini Mazel ci venerebbe issa cappella da u VIImu sèculu è ghjera prima dedicata à San Germanu, l’appellazione San Roccu venerà à trighera (NDLR Serà ligata forse à un’epidemia di pesta chì San Roccu era invucatu per parà a pesta).

Per istrada infattai à casu à Arrigu è à Meon chì fù pastore per issi cuntorni, cù u garbu è a manera mi discrisse tanti nomi scurdati for di a memoria cullettiva, I Sampinelli, U Scogliu Lisciu, U Pinzu, A Grotta Purcaghja, è Cuveghje, tanti nomi vechji chì palesanu una civilizazione millenaria chì ùn hè più…

Dopu à un'oretta di attippera ci si ghjunghje à u rimitoriu di Sant’Anghjulu, postu à 354 metri inde un alivetu, muratu cù petre calcinose bianche, fù prima una cappella chì vense fatta da rimitoriu à u XVIImu seculu. Rimiti chì ùn eranu nè di u cleru regulare nè di u cleru seculare ma paisani chì si vulianu spiccà da u mondu materiale (d’e volte i pudemu puru capì !) è campavanu à l’affollu di i pastori è oleicultori di i cuntorni.

Da Sant’Anghjulu, vi guderete un panorama ùnicu, da e sponde capicursine à a vechja Conga di Nebio (Diàlogo Nominato di Corsica, Agostino Giustiniani) turnata Conca d’Oru, i vigneti di Grotte di Sole sinu à l’altiera chjesa San Martinu di Patrimoniu, a cappella di San Quìlicu, via…
Sottu à a spilonca ci si puderà scopre l’agrottu di Scaffa Piana, chì era accampatu à u Neulìticu mezanu sinu à u perìudu rumanu, secondu stòrichi s’impara chì l’omi di tandu si davanu à l’allevu purcinu è pecurinu, ammaistravanu e tecniche di a spurtelleria è manghjavanu alive.

Da leghje nant'à u situ Histoire du Nebbiu

Per i trè quarti di i sanfiurenzinchi, saria statu datu u nome di San Fiurenzu per via di San Floru, un màrtire rumanu di i primi sèculi chì a salma hè purtata sempre per a trianninca u luni di e Pentecoste.
À e tradizione rumanzesche li preferimu l’agiugrafia chì accerta di l’esiliu di 46 veschi di a provincia rumana di Africa durante u regnu di Tharasamund (496/523).
Frà i veschi ci fù di sicuru à San Fiurenzu chì e reliquie seranu tramandate ver di l’ottesimu seculu da u vescu Tizianu ind’è u nordu di l’Italia in Trevisa per prutege le da l’invasione saracine.

Secondu à ben di Geneviève Moracchini Mazel esistia una cappella rumànica vicinu à u portu è dedicata à San Fiurenzu chì nanzu di diventà un presidiu, eranu cullucati magazini sfruttati da marini capicursini.

Hè in u 1440 chì u genuvese Giano Campofregoso fonda nantu à a punta di Portu Pidochju chjamatu dopu Marina di Piazza po Marinuccia oghje, à San Fiurenzu, hè à tempu portu è furtezza, è ghjova à i Genuvesi da ch’elli possinu cuntrullà u Nebbiu sanu, avendu sempre à vista e saline cullucate in fondu di u golfu.

A parolla "presidiu" indetta à iss’èpica quì e cità furtificate longu à a costa ch’ella avia fundatu à u Medievu a Republica genuvese, ci campa una populazione lìgure, dutata di privilegi particulari è prutetta da una guarnigione.

Per quelli chì si senterianu in polzu, l’invitu cum’è à mè à fassi una corsa à parte da a piazza di u paese. Seguitemu u percorsu di quella corsa turnata famosa di a Granuchjaia.

Francu Ceppittone chì era postu à vigneti, spàragi è orti c’avviemu nantu à u rinaghju di a Roia (vechje saline XVmu) è u chjosu longu postu à amanduli è alivi.

Ci si vedenu cale parechje, occhinese per i battelli chjuchi, Ansari per e galere è i galioni, a cala di Fornali induve l’ultimi scavi di u 97 anu permessu a scuperta di ànfure è chjappuli di u IIIu sèculu, infine pudimu ammintà e cale di Fiume Santu è Fiume bughju lochi di pesca cun tante signure oghje prezzati da i piacenzeri.

Infine a Mortella chì facia da scalu per i battelli i più maiò à pescaghju forte.

Prima di vede ci edificà una torra à a fama internaziunale, u locu era postu à mòrtula è l’impurtanza era capitale chì i bachi è e fronde anu sempre ghjuvatu inde l’ecunumia di prima, fronde per tannà u coghju, in spurtelleria chì a mortula rimpattava u sàlice inde a fabricazione di i cateri, di i corbi, panere è nasse à pesci. Da mintuvà dinù a sòsula di i pesci di morta cunservati inde un caratellu impiutu à fronde di mortula è di sale chjamatu dinù scapechju.

Hè turnata una torra mìtica dipoi chì l’inglesi ùn la li fecenu à spiantà la dopu à un assaltu. Hè posta à l’entre meziornu punente di San Fiurenzu, cura un rinaghju chì facia da scalu.

L’Agriate un’etimulugia chì batte contru à i guidi turìstichi.

Ciò ch’omu chjama oghje un desertu era da secula seculoru u granaghju di u Nebbiu, u storicu Filippini dice ch’elli sò « sapuritissimi » i prudutti di l’Agriate.

Un ricacciu di Ghjuvanpetru Lucciardi ci dice in « Per ùn guastà l’otre » (1916) scrittu in Eugène FX Gherardi, Les Lucciardi, (Albiana, 2010, p.233) :
« ma fin’à trenta o quarant’anni fà, i zappaghjoli di i cantoni di San Fiurenzu è di Nonza soprattuttu, andavanu tutti l’anni à suminà granu è orzu per issi lochi. Facianu per isse prese, terre, debbiu è machjucastru, è ottenianu divizie guasi miraculose ». Oghje e terre sò inculte.

Ciò ch’è vo chjamate tutti u Sphinx ùn hè mai esistutu, issu mostra alatu di a mitulugia greculatina è egizziana ùn s’hè mai arrettu per i nostri cuntorni.

Li preferimu l’appellazione antica di a Cavallata, ci si scopre in cima l’orme di una batteria à i tempi di i genuvesi.

Vultatu si in paese, v’invitu cum’è mè à andacciunà longu à e sponde di u Portu di San Fiurenzu.
Portu di navigazione di scialu, si dà oramai à u turisimu, 800 posti per ammarrà i battelli, cuntendu ancu quelli nantu à e sponde di l’Alisu
A fisiunumia oghjinca veneria da i travagli di riacconciu iniziati inde l’anni 60, da sapè chì sinu à u sorte di a guerre di u 40, u portu di pesca agruttava circa 25 piscadori chì davanu di manu à una pesca custiera (3 migli di a costa) fattiva assai chì pigliavanu circa 22 0000 chg di pesci à l’annu è 2000 chg d’aligostia.
L’arnesi prediletti eranu tandu u tremaghju è u palàmidu.

Vere àgure citatine, e duie piazze sanfiurenzinche quella di e porte è quella Lefèbvre Desnoettes detta di a Posta o Doria s’imponenu da puntelli di u ritrovu è di u sparte.
Lochi prediletti per cuntrastà è discorre di l’affari di a cità, issi spazii veri di demucrazia lucale venenu dinù accampati da i criampuli è da i bucciadori di tuttu u circondu.

Oltre u patrimoniu naturale è materiale, vi prupongu di sugellà a nostra duminicata cù i cantori di a Cunfraterna Santa Croce, chì cun fede è devuzione amparanu i canti sacri di a tradizione corsa è sanfiurenzinca.
V’aspettanu ogni dumènica à parte da 5 ore, da sapè chì l’amparera si face in corsu è ghjè aperta à tutti !