Un ci hè più nunda à Décathlon

À noi Corsi, a sapete bè ci piace à cunsummà. Ci piacenu i parkings di supermercati, e mascine à cartes bleues, a coda à e casce, e spese... Avemu a passione di u caddie.

Semu poveri, ùn ci hè micca travagliu, a precarità hè sempre più impurtante, i restos du coeur in pienu sviluppu, ma a prupurzione di supermercati è di grandes surfaces hè a più forte di Francia. Hè cusì, à noi ci piace à spulà i nostri soldi, pè u più grande piacè di i grandi patroni.

Dapoi mercuri dunque, i passiunati di caddies è di catini sò cuntenti. A marca Décathlon hà apertu un magazinu in Sàrrula, è semu passati vicinu da a guerra civile.

Tutta a ghjurnata ci hè statu un mondu scemu. I rayons cumplettamente spachjati. À chì n'hè ripartutu cù veste Millet, à chì cun slips pè fà a bissicletta, à chì cun materiale di musculazione (chì di tutte e manere ùn serà mai utilizatu). Ci saria ancu statu una scuzzulata è trè feriti, per via d'una prumuzione nant'à articuli di piscina.

Tuttu cuntinuveghja d'andà benissimu in Corsica. Quì cummencia u terzu mondu...