U ritornu di a paura rossa

I 10% di a lista di u Front de Gauche hà rilanciatu qualcosa chì pensavamu fà parte di a storia di u seculu passatu : l'anti-cummunisimu.

A palma hè per Stéphanie Grimaldi chì hà infiaratu u so discorsu nanz'à u segondu giru cun : "Il restait Cuba et la Corée du Nord, voulez-vous y ajouter la Corse ?"

Hè vera, Bucchini à l'assamblea è Stefani à i trasporti è a Corsica n'averia prufittatu pè dichjarà l'indipendenza à a Francia, sorte di l'OTAN, rilancià u Pacte de Varsovie è dichjarà a guerra à i Stati Uniti.

Dopu à Fidel Castro è Kim Jong-Il, avemu à Dumè Bucchini chì in vechjaia diventa una figura mundiale di u cummunisimu.

È perchè micca Michel Stefani in u rollu di Sambucucciu d'Àlandu di l'anni 2000 ?

Per fà paura à l'elettori, l'UMP averia pussutu andà più luntanu è annunziacci chì :

l'armata rossa hà da sbarcà à l'Arinella

l'URSS hà da impiantà i so missili nant'à u Cuscione

u Cunsigliu Generale di Corsica Suprana hà da diventà una basa secreta di u KGB

e statue di Napuliò anu da esse rimpiazzate da quelle di Staline è di Jean-Paul Israël in Aiacciu

Emile Zuccarelli hè un anzianu officiale di a Stasi

a Tavagna hà da esse cullettivizata

U SCB hà da scambià di nome per diventà u Spartak di Bastia

tutti i membri di u MEDEF seranu trasferiti à u Goulag, ancu Fanfan Vendasi

I Porsche Cayenne seranu interdetti è rimpiazzati da i Lada

Ange Rovere presenterà Corsica Sera

è di siguru chì i cummunisti manghjanu i so zitelli.

Camarata Rocca Serra è nostàlgichi di a "Guerre Froide", ùn appiate paura. A rivuluzione ùn hè micca per dumane.