SMS in lingua corsa

U SMS hè una manera di cummunicà à l'accorta, in furia. Hè una manera di salutà qualchissia, di piglià cuntattu, di stuzzicà qualchissia, di cappià si di più chè à u telefonu, di viva voce.
Pò esse un mezu di spressione più sinceru, più persunale...

A vecu dinù cum'è un arnese pedagogicu. Si puderà amparà u corsu incù i SMS? S'ellu ùn si pò micca, di sicura, amparà una lingua solu incù i SMS, i SMS, pare ch'elli sò un arnese di primura per una lingua. Sò oramai un puntellu chì una lingua viva oghjinca ùn pò francà.

Hè per quessa chì vi prupongu di scrive quì sottu, ind'è i cummenti, unepochi di i vostri SMS in lingua nustrale! Soca, averete a vergogna di scrive li tutti tutti...
U scopu di sta racolta ùn hè micca di visticà i sicreti di a vostra vita. Vulemu solu dà ci idee, per a scrittura, ma dinù custituì un piccula antulugia di i SMS corsi di modu à misurà l'adattazione di u corsu à a vita oghjinca è à e tennulugie nove.

Pudete dinù mandà ci l'adattazione urtugrafica di certe parolle corse in l'urtugrafia SMS. Per esempiu: "Chì faci?", si puderebbe scrive "Ki faci?". "Iscia" mi dicerete ! Date mi puru u vostru parè!