Paul Giudicelli : 'u stadiu di Furiani hè cunfurtèvule' !

Ma hà ragiò Paul Giudicelli. Ùn face ch'è 16 anni ch'è no aspettemu d'avè un VERU stadiu. Allora 10 o 15 anni di più..

Segondu à ellu dunque, si pò andà in Furiani "en toute sécurité, sans problème et avec un certain confort"...

Tuttu dipende ciò ch'ellu si sente pè "certain confort"...

L'ultimu esempiu ? Luni sera, contr'à Reims. Piuvia chì ne falava è tandu ci vole à circalli i lochi "cunfurtèvuli" in Furiani... Ùn ci hè ch'è da vede e fiure di france 3 di stu macciu pè rendesine contu.

E tribune Est è Ouest ùn si ponu adoprà quand'ellu piove. E sole tribune cuperte sò e laterali. Ma a Nord ùn hè cuperta ch'è à metà, è pè u pocu chì ferma ci sò infiltrazioni è spiscine... Ancu quand'è vo site à l'aggrottu, site incrusciatu ! Ferma a Sud, tutta rughjinosa è d'un altru seculu...

Fidighjate stu ritrattu : u stadiu di FURIANI hè siguramente u solu innù u mondu INDUV'ELLU CI VOLE UN PARACQUA SOTT'à U TETTU !!!

Sò dunque i 3/4 di e piazze ch'ùn si ponu adoprà e sere di piogia in Furiani. È ùn parlemu mancu di quand'ellu soffia u ventu... Hè forse quessa chì Paul Giudicelli sente pè "un certain confort"...

Ma hà ragiò, monsieur Giudicelli. Face dui seculi ch'è no aspettemu di sorte da u terzu mondu, pudemu aspettà torna appena.

Ùn avemu micca finitu di tichjaccine di baccalà. A ci dicenu i nostri propii eletti...