Ondeci ragioni d'andà à visità à Parma

Spessu i Corsi chì vanu in Italia sceglienu à Firenze è Roma, duie destinazione predilette. A regione di l'Emilia Romagna hè menu cunnisciuta, ma interessante assai è faciule d'accessu : bastanu duie ore di vittura da u portu di Livornu per ghjunghje in Parma.

Peccatu di privassine !

Duvemu duie invenzione culinarie magnifiche : u parmigianu è u prisuttu di Parma. Ùn vi pare nunda ? Hè inutile di divvi chì Parma hè una cità induve si manghja benissimu. Per ciò chì hè di a salumeria, di i furmagli è di e paste, hè una campa. Ùn mancate micca a torta fritta (chjamata dinù Gnocco fritto in Modena è Reggio Emilia), i tortelli d'erbette è di zucca, è bella sigura u vinu (Lambrusco, Malvasia...).

Bon ci vole à prevede un regime per quand'è vo vultate.

Custì, a lista hè longa ! Parma pare appena scunnisciuta, ma e belle cose da vede ùn mancanu.

U battisteru :
Hè unu di i simbuli di a cità di Parma. Edificatu à a fine di u XIIu seculu, compiu in u 1270, sott'à u cummandu di l'artistu è architettu Benedetto Antelami. Fattu di marmeru rusinu, stu munumentu hè cunsideratu cum'è impurtante perchè face a leia trà u rumànicu è u goticu.

U domu :
À cantu à u battisteru ci hè a chjesa a più impurtante di Parma. Nentru ci sò i magnifichi affreschi di Antonio Allegri, dettu Il Corregio (hà ancu u so nome in francese : Le Corrège). Hè u grande pittore emilianu di u Rinascimentu.

Prufittate di a bellezza di a cùpula. Risicate u torcicollu, ma vale u colpu.

Ùn mancate a scultura d'Antelami (quellu di u battisteru), cun sta dipusizione di a croce, capidopera di u rumànicu (1178).

Santa Maria della Steccata :
Ùn passate micca à cantu à sta basilica, tesoru di u Rinascimentu parmigianu.

Cum'è curiosità, sappiate chì in sta chjesa si trova u museu di l'Ordine custantinianu di San Ghjorghju, creatu da l'Imperatore Custantinu in u... 312. Ci si trova pitture, ogetti di i Burboni è ancu... a camisgia di Luigi XVI quand'ellu hè statu scapatu.

Glups.

In Parma ci vole andà à vede u palazzu di a Pilotta, custruitu à u XVIu da a famiglia Farnese, i duchi di Parma. In stu cumplessu ci hè un museu archeologicu, una bibliuteca, a Galleria Nazionale (da ùn mancà : i capitoli d'Antelami, e belle opere di u Trecento è u Quattrocento, e pitture di Il Correggio è di Il Parmigianino, un'opera di Leonardo da Vinci).


Eppo ci hè u Teatru Farnese :
Era utilizatu pè e rapresentazione teatrale, i turnei è cum'è sala d'arme. Hè tuttu in legnu.

Ùn passate à cantu à La Spiaggia, pittura di Renato Guttuso, in u 1955. È digià, una critica di a sucetà di cunsumu.

U munasteru benedittinu di San Giovanni Evangelista :
Postu ch'è vo ci site (ùn ci serete micca tutti i ghjorni in Parma...), lampate un ochju à l'abbazia ghjustu à cantu à San Giovanni Evangelista. Visitate l'antica farmacia (o « spezieria »). Traversate u chjostru.

È prufittate una stonda di a calma è a bellezza di a bibliuteca. Tutta affrescata, hè un giuiellu di u Rinascimentu. A decurazione hè stata cumandata da l'abate Stefano Cattaneo di Novara.

Hè discrittu cum'è un abate ribellu, in cunflittu cun l'autorità di a chjesa perchè vulia un dialogu cù e religione. Hè cusì chì in sta magnifica bibliuteca ci truverete scrizzioni in latinu, grecu, arabu, ebraicu, è cirillicu.

L'affreschi sò di u 1573. Ci truverete ancu una bellissima è stunante carta di a Corsica.

A camera di San Paulu :
Stu munasteru hè statu affrescatu da Il Correggio (sempre ellu). Capulavoru di u Cinquecento.

In Parma vi piacerà di spassighjavvi pè e piazze è i carrughji (puliti) di sta cità calma chì ùn hè micca pigliata d'assaltu da i turisti.

U centru hè pedunale, e vitture sò poche è i parmigiani si spasseghjanu à bicicletta.

A sera ùn mancate di piglià l'apperitivu (un spritz bella sigura).

Impussibule di parlà di Parma senza ammintà a so tradizione musicale.

Principiemu cù u Teatro Regio. Compiu in u 1829, hè un altu locu di a cultura taliana. Si pò visità.

Hè statu cummandatu da Maria Luigia d'Austria (sapete, a moglia di Napuleone) chì era duchessa di Parma. Hè tenuta assai da i parmigiani pè u so regnu è u so ricordu hè sempre vivu.

Per esempiu, dicenu ch'ella permettia à i più poveri d'andà à u teatru, riservenduli piazze menu care. A chjamavanu "la bona duchessa".

Sempre avà, i Parmigiani sò riputati pè a so finezza, a so passione pè a musica classica è l'opera. U publicu parmigianu hè cunsideratu cum'è duru è esigente.

Hè a cità di u grande direttore d'orchestru Arturo Toscanini. È vicinu di Parma hè natu u cumpusitore Giuseppe Verdi. Hè onoratu cum'ellu ci vole.

Cunniscite tutti e so opere :  « La donna è mobile » di Rigoletto, u « Brindisi  La traviata, « Va, pensiero » di  Nabucco è a « Marcia trionfale » d'Aida.

Di u colpu, hè nant'à l'aria di a Marcia trionfale chì i ghjucadori di Parma entrenu in campu :

Ùn dà micca a listessa ambienza ch'è "Sò Elli", ma hè bè dinù.

Ùn si pò finisce senza parlà di futbol. Tutti quelli chì anu seguitatu u ballò talianu in l'anni novanta s'arricordanu di u bellu ghjocu praticatu da l'AC Parma, cun Brolin, Asprilla, Zola, Grün, Bennarivo, Di Chiara, Melli...

A squadra hà vintu trè coppe d'Auropa (duie UEFA, una C2). U stadiu Ennio Tardini hà vistu ghjucadori cum'è Dino Baggio, Crespo, Sensini, Fernando Couto, Buffon, Cannavaro, Verón, Taffarel, Stoitchkov, Ortega...

Ma ancu Reynald Pedros. Face omancu un puntu cumunu cun Bastia.

Ma tuttu què era à l'epica di Parmalat. A sucetà hè andata à fallimentu. In u 2014 u club ùn avia mancu più soldi per pagà u bus. Falata in quarta divisione, torna à ricullà pianu pianu à u livellu u più altu è oghje si batte per vultà in Serie B.

Per ciò chì hè di a tifoseria u gruppu u più vechju sò i Boys, nati in u 1977. Sò amichi cun l'ultras di Bordeaux.

Ritrattu : boysparma1977.it

Frà i so nemichi : quelli di a cità vicina di Reggio Emilia. U derby pè a cullata trà Parma è a Reggiana hà da esse caldu quist'annu...

Esiste una lingua parmigiana, chì hè una varietà di l'Emilianu. Per elli hè un "dialettu" ch'elli chjamanu "pramzàn". È si pò leghje ogni settimana in a rubrica futbol di u grande cutitianu "La Gazzetta di Parma".

Dop'à ogni partita di campiunatu, e note di i ghjucadori di Parma sò in "pramzàn".

(Un'idea pè i media nustrali ?)

Bon ok, custì era un macciacciu (face un segondu puntu cumunu cù u Sporting).

I citatini si primureghjanu di a qualità di vita è di l'ambiu. Vitture pruibite in u centru, misure pè incuragisce a pratica di a bicicletta è l'usu di i trasporti in cumunu. Da leghje nant'à Le Parisien chì cita à Parma in u so Top 10 des villes éco-intelligentes.

È quessa face di Parma una cità propiu piacente.