À cantu à ellu John Travolta nentr'à Pulp Fiction pare un zitellu chì sorte da u catechisimu.
Poca nutizia ch'ella ci hà amparatu Corse-Matin l'altru eri. Per quelli (cum'è mè) ch'ùn lu cunniscianu, eccu reassunta a so vita abbastanza animata.
Ghjaseppu Tumasgiu Recco, di Prupià, averia pussutu sceglie una vita di piscatore tranquillu di u Valincu, invece, micca troppu.
Messu in causa in una disparizione di trè turiste allemane, ci la face à sortesine senza nunda.
Ma in u 1960, allora ch'ellu pesca cù a dinàmita innù u Valincu, si face chjappà da una guardia maritima. Piuttostu ch'è di risicà di pagà una sèmplice amenda, sceglie di tiralli una fucilata è di tumballu à colpu di... petre. Cundannatu à morte, hè graziatu da de Gaulle è cundannatu à a prigiò à perpetuità. Finalmente esce di prigiò in u 77.
Si serà calmatu Tommy ? Pensate...
In u 79, à a vigilia di Natale, l'omu decide di fà un hold-up à un Mammouth di u meziornu di a Francia. À a so manera : trè giovane cascere sò tombe, una balla innù u tupezzu per ognuna.
Un mese dopu, innù u Var, una zitelletta d'ondeci anni chjama à u succorsu à u teleffunu : u so babbu si face minaccià da un tippu appena stranu. Un vicinu corre per aiutalli. Quandu a pulizza ghjunghje, a zitelletta, u so babbu è u vicinu sò trovi tutt'è trè, una balla in capu.
Un mese dopu, Tommy Recco hè arrestatu. In u 1983, hè cundannatu una segonda volta à perpetuità.
Oghje, à settanta quattr'anni, dice ch'ellu hè malatu è ch'ellu dumanda à sorte. U so casu hè siguramente un argumentu di pesu per i difensori di a rétention de sûreté pè i prigiuneri periculosi : cundannatu à perpetuità, à i sei disgraziati chì anu avutu a sfurtuna di cruciallu li sarianu siguramente piaciutu ch'elli u si tenissinu in prigiò piuttostu ch'è di liberallu.
A Corsica dice à vedeci à Edmond
