Era megliu nanzu...

L'ora era troppu grave, i Bastiacci ùn pudianu più stà senza u so logo novu novu, e manifestazioni, u disòrdine è l'anarchìa si fecìanu troppu periculose per a securità di i citatini, ci vulìa à tutti i patti à cambià u logo di a cità di Bastìa. Nant'à a Traversa falàvanu i curtei di Hooligans scatinati, nant'à a Pià si battìanu ogni ghjornu bande di sgaiuffi impistati è pronti à rompe tuttu per ottene un nuvellu logo. Via, l'affare era pè imbruttassi da veru è a Merrìa hà messu e mani in pasta...

A Municipalità hà dunque vulsutu calmà a so ghjente è hà ingagiatu un spezialistu Francese di i logos per ch'è n'àppiimu unu di quelli ancu noi. L'anu pagatu. U risultatu hà rassirinatu a situazione, appaciatu l'azizumme generalizatu è imbellitu a vita cutidiana di i Bastiacci :

Micca male, chè ?

Torna una bella prova, un logo chì suda l'essezza Bastiaccia. Un bellu logo, chì nunda ch'à vèdelu ci face pensà à Bastia. U rossu, l'aranciu è u giallu sò custì à ramintacci i culori caldi di e nostre facciate è e forme attundulite spèchjanu u caràtteru baroccu assai spartu in Bastìa. Eccu per a spiegazione ufficiale. Bonu..

Noi altri chì truvemu sempre à chì dì è à criticà, pensemu quantunque chì stu pòveru logo raprisenta à Bastìa solu perchè anu scrittu u nome di a nostra cità sottu à u disegnu. Ch'osinnò, puderebbe esse ancu astra robba :