A lingua corsa più forte ch'Alzheimer

Per luttà contr'à Alzheimer, parlate corsu ! Ancu u Figaro a dice, incredìbile nò ?

Bon in fatti hè u bislinguisimu chì frena a malatia. Sò circadori canadiani à avecci travagliatu nantu. Anu rimarcatu chì u fattu di parlà duie lingue è più ritarda a pèrdita di memoria.

Invece, gattiva nutizia, a lingua corsa ùn pò fà nunda contr'à Parkinson, per avà.

Eccu un argumentu in più à favore di a lingua corsa, di u bislinguisimu in a sucetà è in a scola.

Micca siguru quantunque ch'ellu basti pè cunvince tutti quelli, nùmerosi, chì s'oppònenu à l'insignamentu obligatoriu di a lingua corsa à a scola (da vede nant'à u blog di l'APC).

Esse pè l'ugualità, a libertà, a fraternità, a laicità, a tulleranza, và bè. Ma pè a lingua corsa, ùn ci vole micca à esagerà, quantunque...