A guerra di u minchju

William Shakespeare hà scrittu una pezza di teatru intitulata “Beacoup de bruit pour rien”. Simu in pienu nentru. Nuvembre 2011 dunque firmerà in a storia cum’è quellu induve i Corsi si sò messi à ragiunà, à cuntrastà, à annerbassi, à mughjà... per una storia di cazzu. Iè, ne simu custì.

E riazzioni chì sò nate di l’articulu publicatu mercuri (in i cummenti, ma sopr’à tuttu ind’i fora) c’imponenu di fà “juste une mise au point”, cumu averia dettu Jackie Quartz.

Dunque :

Nò, u famosu ritrattu di Limelette ùn hè micca un’offesa à i “valori” di a nostra “Santa Nazione Corsa Cristiana”. D’altronde, site veramente siguri chì i nostri antichi, i nostri vechji avianu un rispettu tremendu pè a religione ? Ùn mancanu e storie è i stalvatoghji paisani pieni d’anti clericalisimu è dispettosi pè a religione.

Nò, ùn diventimu micca a caricatura di ciò ch’è no ùn simu micca. Difende a Corsica ùn vole micca dì esse integristi religiosi. D’altronde, a Chjesa corsa ùn hà dettu nunda è mancu u Vescu ùn hà riagitu. Serà ch’elli si ne impippanu di stu “non evenimentu”.

Iè, l’affissu era goffu, era una pruvucazione è un colpu di pubba d’un tippu chì si vulia fà cunnosce (hà riesciutu, avà tuttu u mondu u cunnosce !). D’accordu, ùn hà u talentu nè di Desproges, nè di Coluche, nè di Benetton. Ma chì pò fà ?

Iè, si pò esse cristianu è infuttesine cumplettamente di u famosu ritrattu.

Nò, st’affissu ùn avia micca da esse messu in carrughju, vicinu à e scole. Ma o ghjente ùn v’inchietate, grazia à internet è à You Porn, i vostri zitelli ne sanu più ch’è voi nant’à e pratiche sessuale...

Iè, interdisce una mostra, una libru, un filmu ùn si face micca, puru s’elli sò goffi. Hè una debulezza è hè esse riazziunariu. Zitelli, sappiate chì 30 anni fà eranu i cuncerti di i gruppi corsi è i libri in lingua corsa chì eranu difesi in certi lochi. Ùn caschemu micca da u latu di u censore.

Nò, ùn avemu micca scrittu chì quelli chì anu interdettu a mostra di Limelette eranu drugati, calibrati è cuccainomani... S’ella hè veramente quessa chì pone prublema, turnate à leghje l’articulu !

Iè, a Corsica hè malata, ma quessa a sapiamu. Malata perchè perde a so identità, a so lingua, a so cultura. Malata dinù perchè ci hè un difettu di demucrazia, di spressione, di cuntrastu.

Iè, ci hè una crispazione identitaria è circhemu di fà nece d’esse attaccati à l’anima corsa. Ma chì ci ferma di l’anima corsa ? Qualessa ? Quella mitificata di “a Corsica di mammone” ? O quella d’oghje, vale à dì quella di i soldi, di a droga, di l’individualisimu, di a cunsumazione, di u parè, di Quick è di Décathlon ?

Nò, stu cazzu ridiculu ùn hè micca un’agressione contr’à a Corsica. L’agressioni, circatele da u latu di i maffiosi, i grossi dealers, i trafficoni, i speculatori, quelli chì vendenu a so terra à i ricchi fresteri per fassi dui soldi, per cumprassi un quad è andà à Bali. Circatele dinù in u campu di i Corsi chì neganu a so identità, chì si scordanu di ciò ch’elli sò, chì ùn volenu sente parlà corsu.

Iè, ci hè un prublema d’identità, a sapiamu dinù. Ùn basta di mettesi un treilli è di mughjà nant’à Facebook ch’è no simu corsi per esselu.

Nò, ùn femu micca u sbagliu di mischjà identità è religione, hè periculosu. D’accordu ci hè una longa storia cristiana in Corsica. Ma si pò esse corsu è esse attea, ghjudeu, musulmanu, cummunistu o anarchistu... Pare incredibile d’avè à dilla. Purtantu, ùn hè quessa a visione umanista di Pasquale Paoli ? Averemu da ghjustificassi ancu di quessa ?

Nò, ùn hè stata quistione di fà una lezzione di murale à i studienti. Ma à noi, à A Piazzetta, u nostru scopu ùn hè di stuzzicà a ghjente è di mette u ditu induv’ellu face male per facci riflette ? Sinnò, per ùn pensà micca, ci hè TF1 è Skyrock.

Iè, ci hè un pruverbiu corsu chì dice “campa è lascia campà”. Una pruvucazione cù u ritrattu d’un cazzu ? È allora, chì pò fà ?

“Anu l’ochji ma ùn ci vedenu micca” (Psaume, 134, 2)

È cum'è A Piazzetta hè un locu di dibattitu è di spressione libera, eccu in "droit de réponse" u puntu di vista di qualchissia chì sustene "l'occupazione" di a mostra di Limelette da i sindicati :

" Avete tutti intesu parlà di l’affare gravissimu (sic) di l’espusizione « Histoire d’une absence » d’un giovanu studiente di l’Università è di e riazzione chì l’anu seguitata. I sindicati curtinesi anu vulsutu reagì contr’à ciò chì l’hè parsu una pruvucazione maiò è si sò pisate ùn sò quantu voce - da u forum di RCFM à i più sinistri comptoirs - da dinunzià sta « talibanizazione » di i sindicati chì sarebbinu, d’un colpu, diventati peghji cà i SS.

Difatti, vista da luntanu, st’interdizzione fatta à un « artistu » di pudè prisintà a so « opara » pò esse capita cum’è una pratica antidemucratica.

Ma ci vularebbe quantunque à ramintà certi fatti à prupostu di st’affarucciu chì face traparlà a Corsica sana è ancu al’di là (vede a petizione).

Ind’è noi, ci piace à castrà i grilli allora chì st’affare ùn a si merita forse micca. Arricurdemuci chì u ritrattu, ogettu di u scandalu, hè statu affissatu d’apartuttu in Corti è davant’à una scola primare in particulare. Ùn dubbiteghju manc’appena chì l’affissu abbia pussutu piace à certi, « tout les goûts sont dans la nature » dice u francese, ma quantunque, l’autore ùn era forse micca ubligatu à impone un cazzu – u soiu ?- à a ghjente da prisintà a s’espusizione. À ch’a si cerca, trova, di regula, « qui sème le vent… ».

Mi pare chì custì, ùn si tratta micca d’estresmisimu religiosu, ma piuttostu di bon’sensu, ùn cridite micca ?

A giuventù agisce spessu cù u core è senza riflette sempre à e cunsequenze ma ùn ci hè stata viulenza, nè fisica, nè murale ind’a riazzione, forse un pocu esagerata, di i sindicati studientini.

Anu pussutu ragiunà cù u giovanu A. Limelette è oppone i so parè di manera pacifica, bellu luntanu di ciò chì s’era passatu in cuntinente per a pezza di teatru o l’affare di u « Piss Christ » per esempiu.

Dunque, ùn valia forse micca à fanne un cuncistoriu di st’affare, sopr’à tuttu chì a cosa a più impurtante, ghjè chì u corciu A. Limelette hè avà grilliatu cù e zitelle di a facultà. "