A guerra di i saldi

Ind'i tempi antichi a vita curria à u rìtimu di a natura. À ogni stagione i so travaglii : tribbiera à u principiu di l'estate, castagne à l'entre di l'inguernu, impiaghjera è muntagnera per i pastori...

E feste religiose venianu à incalcassi nant'à stu rìtimu di u tempu. Natale, Pasqua, San Ghjuvà, 8 settembre...

Oghje a nostra vita hè ritmata da e feste di a cunsumazione. E duie festoni di l'anni sò dunque i saldi, quelle d'inguernu è quelle d'estate. À mezu, ci hè Halloween, a rientrata, a Saint Valentin, Fête des mères, Fête des pères, Festa di i curnuti, Fête des beaufs, eccetera.

Dapoi oghje, i parkings di e chjese nove sò pieni à tappu. I praticanti di a religione nova anu empiutu i tempii di a cunsumazione.

Si fala à posta da u paese per esse presente u "jour J". Megliu : certi anu postu u so famosu jour de congé pour faire les soldes.

A quistione nant'à tutte e labre hè dunque dapoi sta mane : "oh, tu as fait les soldes ?"

Cum'è in ogni religione, ci sò ancu i fanàtichi. Quelli chì mettenu a sveglia à 7 ore per fà l'apertura di i magazini. Quelli chì facenu passà in forza u so caddie pè ghjunghje u primu...

Iè, cusì si passa ind'è noi oghje. È da quì à 100 anni, u futuru Pierre-Jean Luccioni ferà un articulu nant'à l'apertura di i saldi in u so "Tempi fà : a Corsica in l'anni 2000".