A California à e ghjurnate di Corti ?

Dop'à u Brexit, u Calexit ? Hè statu autorizatu u 26 di ghjennaghju scorsu u lanciamentu di a racolta di signature per l'organizazione d'un referendum nant'à l'indipendenza di u statu americanu. Per quessa, ci ne vole 600.000 allocch'è à u mese di lugliu.

Perchè quallà dinù, ci sò l'indipendentisti. Lanciatu in u 2015, Yes California hè un muvimentu chì si batte pè l'organizazione d'un referendum nant'à a creazione di a Republica di California.

Bon d'accordu, l'argumenti ùn sò micca veramenti i listessi ch'è in Corsica. Ùn si parla micca di statu americanu assassinu, di lingua califurniana in perìculu, di califurnizazione di l'impieghi.

I partigiani di a scappera, liberali è aperti nant'à u mondu, si trovanu in disaccordu cù u restu di l'America, ghjudicata troppu cunservatrice.

Ci vole à dì chì a California hè un statu speziale. Prima hè una putenza economica. À ella sola, saria una putenza mundiale. Ùn hè micca custì ch'ellu ci vole à circà una leia cù a Corsica.

Prugressisti, à a punta per l'eculugia, a tradizione hè chì a California voti pè i democrati. Hè cusì chì dnuvembre scorsu, avia legalizatu a cunsumazione di marijuana à usu recreativu.

I califurniani sò custì dinù luntani da i cunservatori americani... è corsi. Allora quandu l'America à vutatu à Trump, i dibattiti nant'à a surtita di a California da i Stati Uniti s'hè rivittulita.

Di dicembre, un sundame dave i partigiani di u Calexit à 32%. Ma a strada ver'di l'indipendenza hè tamantone. Per mudificà a custituzione americana, ci vulerà à cunvince 38 di i 50 stati.

L'indipendenza hè torna appena luntana. Ma pè e ghjurnate di Corti, perchè micca ?