U top 15 di e frase nant'à a Corsica

1. "J'ai honte d'être corse". L'abitanti di Marseglia o di u 93 si vergognanu d'elli quandu ci hè un assassiniu ? Nò. Ma noi altri Corsi, ci sentimu obligati di culpabilizà più chè l'altri.

2. "Corsica, ùn averai mai bè". Sta frasa saria stata prununziata quandu fù tombu u conte Arrigu Bel Messere... 1000 anni fà. Difficiule di sorte da u fatalisimu chè no ci trascinemu dapoi tantu tempu.

3. "Si ça continue comme ça, je m'en vais vivre ailleurs". Pruvate puru, ma ùn hè micca megliu in altrò.

4. "Les Corses doivent prendre leurs responsabilités" (Manuel Valls). Frasa strana prununziata da u ministru di l'internu dopu à l'assassiniu d'Antone Sollacaro. Vole dì chì u Statu ùn piglia e so rispunsabilità ? Forse hè una chjama à a vindetta ? O serà chì ogni Corsu hè culpèvule di ciò ch'elli facenu i maffiosi ?

5. "Povera Cursichella". U statutu u più spartutu nant'à Facebook quand'ellu ci hè un assassiniu hè "povera Corsica"... Ma i lamenti ùn anu mai fattu veramente scambià e cose.

6. "Chì voli fà... hè cusì". U discorsu fatalistu "ùn si pò fà nunda contr'à i maffiosi, hè cusì" hè forse u peghju discorsu à tene. In Sicilia, a sucetà civile hè in prima linea in a lotta contr'à a maffia. Ma in Corsica, simu tutti spettatori di ciò ch'ellu si passa... è a pulizza è a ghjustizia dinù.

7. "In Corsica simu una mansa di closce". Purtantu, ùn simu nè megliu, nè peghju chè l'altri.

8. A criminalità in Corsica hè a più forte d'Auropa. Cù 17 assassinii quist'annu (à u 15 di nuvembre) pè 300.000 abitanti, hè di più chè in Albania o u Kirghizistan. I spezialisti di l'anti-maffia taliana ùn capiscenu micca perchè u Statu francese ùn ci la face micca à risolve stu prublema. Serà ch'ellu ùn hà micca a vuluntà.

9. "Basta Basta Basta". È una volta ch'ella hè detta quessa ?

10. "La Corse va mal". Frasa di Camille de Rocca Serra nant'à Europe 1. Merci, quessa a pudiamu truvà ancu noi.

11. "C'est l'escalade, un pas a été franchi" : Purtantu, cun più di 500 morti in 20 anni, face un pezzu ch'elli si francanu i scalini.

12. "En Corse il y a trop d'armes à feu". Durante a campagna presidenziale, Nicolas Sarkozy si vulia attaccà à "la détention d'armes légales trop nombreuses". For'chè l'arme chì tombanu u più in Corsica ùn sò micca l'arme "legale", ma quelle di i maffiosi, di i "cuntratti" d'amazzadori prufessiunali.

13. "Il faut un retour de l'état de droit en Corse" Face dunque 30 anni ch'ellu si sente sta frasa. Ch'hà fattu u Statu sin'avà ?

14. "Laissons la police faire son travail..." o piuttostu cuntà i punti ? : Quand'elli volenu, l'assassini i trovanu. Un Statu chì lascia un populu stirpassi trà d'ellu, ùn hè a peghju di e viulenze ?

15. "Le combat cessera faute de combattants" : Avia dettu un prefettu in l'anni 90, quandu i naziunalisti si tumbàvanu trà d'elli. Bisognu d'aghjustà qualcosa ?

Bonus-track : "Quelle image on donne de la Corse ?" Serà forse ora d'inchietassi piuttostu di u paese chè no simu in traccia di lascià à i nostri figlioli chè da a fiura chè no demu à l'altri, chì di tutte e manere ùn ci ponu pate.

Face un pezzu chì i Siciliani anu capitu chì a situazione passa dinù assai pè l'educazione è a cultura. È noi ?