A Piazzetta, blog in lingua corsa - blog en langue corse / apiazzetta.com informations, actualité of corsica
ATTUALITÀ CORSA FUTBOL BETTUNIZEMU MAGAGNA CULTURA SUCETÀ VIDEO GIURNALE CUMU SI DICE... CUNTATTU / PUBBA
Accueil
Envoyer à un ami
Version imprimable
Partager

U ponton di d'Ormesson

In a riserva naturale per sgiò di San Fiurenzu, u Statu hè decisu à prutege i so vechji cucchi minacciati di sparizione.



U ponton di d'Ormesson
A Corsica hà a furtuna d'avè parechje riserve naturale per sgiò chì u Statu francese prutege. A più cunnisciuta hè quella di "Punta d'Oro" (chjamata à i tempi antichi Cala Purcina).

Ma ci hè dinù quella di San Fiurenzu, più precisamente in Fòrnali. Custì, à u principiu di L'Agriate (scusate, ci vole à dì "Le Désert des Agriates", face di più "exotique") ci hè una piccula riserva di sgiò chì ponu fà ciò ch'elli volenu cù a prutezzione di u Statu.

Digià in u 2000 (!) u muvimentu A Manca Naziunale avia fattu stu situ chì vi spiega tuttu.

Pè riassume, i sgiò di i lochi (Béguin, Jean d'Ormesson...) si sò pigliati u duminiu pùblicu è anu custruitu di manera illegale i so hangars è pontons per i so battellacci.

È chì face u Statu ? Induvinate ! Cundannati in un primu tempu à distruge ste custruzzioni illegali, u Conseil d'Etat, a cima di u Statu, u fiorfiore di a Republica, vene d'annulà stu ghjudicamentu. Megliu : u Statu deve pagà 3000 euri à a SCI du Cap, prumutore di i lochi...

Dapoi oghje, una videò messa in linea nant'à Dailymotion mostra un filmatu di u 2000 realizatu da Corse TV nant'à stu sugettu è mai mustrata à a televisiò. Fatevi a vostra opinione da per voi...

Eiu aghju decisu di sustene l'amichi di Sarkozy è Jean d'Ormesson. Dumane, compru u Figaro !



u 17 di Ghjugnu 2009
U Sgaiuffu



1.mandatu da in cauda venenum u 18/06/2009 10:20
SI PIGLIANU TUTTU E DOPU C'IMPEDISCENU DI SPASSIGHJA CULPA A QUELLI CHI VENDENU E A L'ELETTI CHI PRUFITANU DI STA SITUAZIONE PER FA I S'AFFARACCI

2.mandatu da Bustanicu un peu u 18/06/2009 10:41
Thermostat 9

3.mandatu da machja u 18/06/2009 14:47
L'Agriate,a l'epica di i Genovesi era u granaghju di a Corsica, granu ci n'era ancu tropu, e i Genovesi u si purtavanu in casa soia.

Oghje u chjamanu "u desertu di l'Agriate", dipoi che u "conservatoir du litoral" l'ha compratu a i "Rotchild"

4.mandatu da u tippu u 18/06/2009 15:37
"agriate" vene forse da u latinu ager, significheghja dunque "locu cultivatu"...

tuttu u cuntrariu d'un disertu !

5.mandatu da sumenta u 18/06/2009 20:14
Un mi surprendre micca di tutta sta ghjente chì s’impadrunisce di u litturale. Compranu i nostri lochi è credenu fà à legge à colpu di soldi è di amicizie bè piazzate. Un ci hè nunda à aspetta d’omi cume quessi. Mà cio chì mi stumaca u piu hè piuttostu l’attitudine di issi corsi chì piglianu a so difesa. Mi ramenta chì certe volte u piu grande prublema di a Corsica so i corsi elli stessi…

6.mandatu da altore u 18/06/2009 20:59
A chì hà solli è amicizia torce u collu à a ghjustizia... sò belli corsi chì cunoscenu ancu i nostri pruverbii!

7.mandatu da quellu u 18/06/2009 23:18
disertu di l'Agriate vole dì disertu umanu è micca locu non cultivatu, a dicenu i sturiani

8.mandatu da Kügürn u 19/06/2009 10:36
diceraghju 7-8

9.mandatu da Ghjuvan Marcu u 19/06/2009 13:44
Ié o sumenta, ai ragiò, ghjè l'attitudine di sti corsi servile chi m'estumaca, sò ancu più arabiati à difende i so patrone chè a so terra....

10.mandatu da sursum corda u 20/06/2009 14:22
l'Agriate eranu un locu di vita. Ci era a ghjente chì ci stava l'inguernu, in Ifana ma dinù in tanti lochi cum'è u Ghignu, Malfaccu , ecc. Ci eranu l'aschesi è è so capre. A' spessu falavanu cù e famiglie. Tandu U Chjerchju , induve ci hè dempre una casa cantunera abandunata, quand'omu colla ver di a bocca di u Vesu, era un puntu di scontru impurtante. Disertu disertu, termine turisticu ...

11.mandatu da Piratella u 27/06/2009 00:26

Sti predatori di i più belli spazii di Corsica si duverianu piattà, almenu, invece nò, facenu i belli è i Corsi li servenu a suppa : in Portivechju oghje è dumane, à "Lire au soleil" (manifestazione chì u sgiò d'Ormesson n'hè presidente) quantu Corsi anderanu à basgià a manu di l'Academizianu : vale à dì unu di quelli chì anu abbaghjatu cum'è cani contru à a mudifica di a Custituzione per facci entre e lingue regiunale !!

12.mandatu da Piratella u 27/06/2009 00:30
Ma cumu ghjustificheghja a so decisione u Cunsigliu di Statu???

Novu cumentu :
Seguitateci nant'à Facebook
L'articuli
Abbunatevi à a newsletter
Circà nant'à A Piazzetta
Ricerca avanzata
Galleria
A maledizzione di e buatte corse
A maledizzione di e buatte corse
1981 : a cuppa hè nostra !
1981 : a cuppa hè nostra !
Ponte Leccia city
Ponte Leccia city