U nostru umagiu à Pétillon

René Pétillon hè mortu è oghje tuttu ognunu li rende omagiu. Avia più ch'è l'altri riesciutu à trattà di a Corsica. Senza offende è ridendusine di tutti : Corsi, turisti, pulizzeri, naziunalisti, omi pulitichi francesi, pinzuti stallati in Corsica... A Piazzetta li deve a so testa di moru.

A testa di moru di A Piazzetta hè ricacciata da un vechju disegnu di Pétillon esciutu in u "Canard Enchaîné" (bellu nanzu à "L'Enquête Corse").

Avia capitu a Corsica megliu ch'è centinaie di giurnalisti è d'editurialisti francesi (è ancu puru Corsi).

Pè A Piazzetta, bella sigura aviamu principiatu senza dumandalli nunda (in u 2007 pè a creazione di u situ).

Allora quandu Pétillon hè venutu pè u festivale "BD à Bastia" semu andati à truvallu per spiegalli. Li avemu arricatu unepochi di numeri di A Piazzetta chì l'anu fattu ride. In quant'à l'utilizazione di u so disegnu, si ne impippava è ci hà dettu ch'è no cuntinuvessimu puru. Ci hà rigalatu i diritti. Era un tippettu stu brittonu.