Tante ragione di scopre à Bergamo

Per andacci ? Hè faciule

Nisuna difficultà per andà in Bergamo s’è vo avete una vittura è un GPS. U più semplice per noi hè di parte da u portu di Savona (2 ore è mezu di vittura). Hè quant’à passà d’Aiacciu à Bastia, u strapazzu di Vizzavona in menu.

A cità alta

Bergamo si scumparte in duie cità. Una parte alta, medievale, ch’ellu si pò raghjunghje à pedi o cù un funiculare. È una parte bassa, muderna è industriale, menu bella.

Flickr / Jacopo Colombo

E muraglie

Bergamo hà a particularità d’esse una di e cità taliane (cun Ferrara, Lucca, Verona, Padova, Treviso è Grosseto) à avè priservatu l’integralità di e so muraglie. Sò i Veneziani, chì anu tenutu a cità durante trè seculi, chì l’anu custruite à i seculi XVI è XVII.

Ancu chì in u 2017, sò state scritte cum'è patrimoniu mundiale da l’UNESCO.

È noi in Corsica, e citatelle chì ci fermanu, ùn e fidighjemu mancu più…

Ritrattu / VisitBergamo

E porte

Ci sò quattru porte per entre in cità alta. A più bella è a più cunnisciuta hè quella di San Giacomo.

A Piazza Vechja

Le Corbusier l'hà discritta cum’è a piazza perfetta. Voi, prufittatene per sciaccavvi un ghjacciu o un caffè.

À cantu, i palazzi antichi (Palazzo della Ragione è Palazzo Nuovo) vi danu l'impurtanza ch'ella avia a cità à u Rinascimentu.

A basilica Santa Maria Maggiore

Hè di stile rumanicu da fora…

…è baroccu da nentru.

A cappella Colleoni

À cantu à a basilica, hè l'altru giuiellu di a cità.

E strette di a cità alta

Spassighjassi per sti carrughji stretti vi ciottanu in un'ambianza medievale.

U Campanone

Stu munumentu hè chjamatu dinù a “Torre Civica”. In sù, truverete a più grande campana d'Italia (grande pussibilità di magagne è selfies per l'amatori di glosce). A so particularità è di sunà 100 colpi à dece ore (sempre avà), ch'insignava a chjusura di e porte di e muraglie.

Pudete cuntà, ma hè longu.

L'accademia Carrara

Un saltu à u grande museu di a cità si pò fà (quì San Ghjilormu caccia un spinzone da a zampa d'un leone).

A pulendina (o "polenta" chì ùn hà nunda à chì vede cù a nostra pulenda)

Hè una di e specificità di u nordu di l'Italia è ùn ci vole à mancà di tastalla. A truverete ancu in versione street food. À quandu a listessa cosa pè a pulenda ?

A stracciatella

Hè in Bergamo ch’ella hè nata a stracciatella, in a gelataria La Marianna, più precisamente.

A manghjusca

Salumi, furmaglie, pasta, carne... Vi piacerà tuttu in Bergamu. In particulare i “casonsèi”, spezie di ravioli tippichi di a cucina bergamasca.

U Monte Bastia

Bon, ci vulia bè à truvà qualcosa chì ci rammenta a Corsica. U Monte Bastia hè un poghju di a cità alta di Bergamo, ma ùn ci hè nisuna leia cù a Corsica.

I chjassi

U circondu di a cità hè bellu è i Bergamaschi anu sviluppatu una rete di camini per quelli chì li piace à spassighjà à pede o in bissicletta.

Truverete libretti, siti web è pannellucci d'indicazione. Si pò sempre sunnià di vede e listesse cose ind'è noi, un ghjornu...

A lingua bergamasca

Ci hè una lingua bergamasca (i taliani preferiscenu parlà di “dialettu”).

Truverete ancu U Principellu.

L'Atalanta

Hè u nome di u mìticu club di futbol di Bergamo. Tene u so nome d'un persunagiu di a mitologia greca.

U club ùn hè mai statu campione d'Italia, ma hè un club storicu. L'Atalanta hè cugnumata a “regina delle provinciali” perchè fora di e grande cità, hè quella chì tene u più presenze in seria A.

Quandu l'attaccu era purtatu da i capilluti (u svede Stromberg è l'argentinu Canniggia).

A so tifoseria hè reputata calda.

L'Alpe Orobie

Flickr / Gianni D'Anna

D'infatti, a cità hè un puntu ideale per quelli chì li piace à caminà. Bergamo ùn hè u paese di u grande alpinistu Walter Bonatti ?

Maslana

Frà e numerose spassighate pussibule, perchè ùn andà à scopre u paisolu di Maslana, chì hà cunservatu a so architettura tradiziunale ?

Flickr / Silverio Lubrini

E castagne

Eccu un altru puntu in cumunu cù a Corsica. Sò numerosi i castagneti in u circondu di Bergamo.

Quand'ella hè a stagione, truverete parechje serate chì vi pruponenu “castagnate”.

È pare ch'elli tenganu à i so castagneti.

Ancu di più ch'è noi ?

Clusone è u so trionfu di a morte

À trè quarti d'ora di Bergamo, truverete u paese di Clusone. Nant'à un muru di un bastimentu d'una cunfraterna, ci hè u so affrescu abbastaza impressiunante chì rapresenta u trionfu di a morte (in data di u trecentu).

A morte culpisce, è ci n'hè per tutti, putenti è chjuchi, veschi è cavalieri. À l'epica di e guerra è di a pesta, era una manera di cunsulassi, mustrendu ch'ellu ùn era risparmiatu nimu...

San Pellegrino

Hè in u circondu di Bergamo ch'ella sorte l'Orezza taliana. È s'è vo vulete, pudete pruvà I so bagni termali. U so "Grand Hotel" abandunatu, degnu d'un filmu di Wes Anderson.