[TRIBUNA LIBERA] Cumu parlà di pulitizazione ?

Sti pochi tempi si sente assai parlà di u rimusciu ind’è l’università francese in giru à Parcoursup è u novu prucessu d’intrata à l’università, chì l’uppunenti ùn ponu accettà cunsiderendu lu cum’è u principiu di a selezzione di i studienti. Si vedenu dunque baruffe, bluccami, è di modu generale a crescita di una forte cuntestazione chì si và allarghendu da i studienti à i prufessori sin’à i sindicati. È ogni ghjornu un’antra università vene mossa da parechje mubilizazioni, sbucchendu aspessu nant’à u ricusu non solu di u modu novu di gestisce i studii ma dinù di u modu di fà campà a sucetà sicondu e pulitiche attuale.

U fattu hè chì ind’u mentre i studianti corsi parenu propiu spassiunati di pettu à sta pulemica. U fattu quasi storicu dinù chì e rivindicazioni studiantine in Francia ùn sò quasi mai state ripigliate in Corti. Ùn serà quì u locu di circà à spiegà sta situazione. Ma ci hè da dumandà si quale hè a natura di ciò chì si puderia cunsiderà cum’è rumpiture ideulogiche trà a Corsica è u cuntinente, cum’è s’è i prublemi francesi, ancu puru nati da tendenze palisate ind’u mondu sanu, ùn fussinu micca i nostri.

Ùn si parlerà mancu à pena di passività chì i studianti corsi sò à spessu pronti à mubilizà si è fà si sente à u livellu puliticu corsu. Ma cumu interpretà sta spezia d’indifferenza à certi affari chì per avà ùn parenu tantu alluntanati da e primure di i Corsi ? Cume hè chì per esempiu parechji ghjovani citatini corsi piglianu pusizione à prò di l’amichi catalani mentre ch'ellu ùn si sente quasi nunda nant’à l’affare di l’università ? Serà chì e prublematiche francese sò sempre troppu carche di pensamenti « di diritta o di manca » è chì i Corsi ùn si sentenu micca cuncernati ?

Hè vera chì ultimamente si leghje è si sente assai nant’à a fine di l’ideulugie, a necessità di francà stu vechju cuntrastu trà diritta è manca è di creà un novu modu di fà a pulitica, per adattà si à stu mondu sempre in cambiu. Si pò dì chì u presidente Macron incarna di manera à bastanza chjara stu modu di pensà è sopr’à tuttu di fà. Ma ùn vole dì chì tutti sò pronti à piglià stu chjassu versu di un avvene quasi « d’obligu ».

À pocu pressu à tempu à ste mosse studiantine pè ‘sse Francie, s’ampara chì Viktor Orban, u presidente ungarese, hè statu rielettu di modu massicciu è asgiatu, ciò chì li dà avà una legitimità per sviluppà u so mudellu di demucrazia « illiberale » (in raportu à « liberale » ind’u sensu inglo-sassonu) cum’ellu dice ellu. S’ellu hà circatu di teurizà stu cuncettu dapoi ch’ellu hè ghjuntu à u putere, a formula ùn hè soia ma esiste dapoi parechji anni. Si tratta cù sta « demucrazia illiberale » di guverni induve, ancu puru s’elle ci sò elezzioni, i citatini ùn anu micca tutta a libertà d’agisce o di fà si sente. Si parla dunque di paesi chì ùn sò nè « liberi » nè « micca liberi » ma « presuntamente liberi », per dilla cusì.

È quandu si vede ciò ch'ellu si passa in Italia, in l’Ingliterra di u Brexit, cù Trump, cù Puttine, forse seria un sbagliu di cunsiderà chì sti « pupulisimi » ùn sò chè muvimenti di scuntentezza, d’azizume generale, senza avvene puliticu perchè chì ùn averianu nisun cuntenutu chjaru. Pare infatti chì si vulessinu custruì cum’è un’alternativa paradussale ma durevule, chì piglieria u contrapede di a mundializazione « appaciata », di ciò chè ci prumittia Francis Fukuyama cù a so « fine di a storia ». U famosu intellettuale mericanu ci spiecava ch'è no eramu ghjunti à a cima di un mudellu sucetale è ecunomicu, vale à dì quellu di l’Uccidente globalizatu, è chì sta cima ùn si pudia supranà.

Pò dunque inchietà, piace o ancu fà paura ma si pò dì ch’ellu hè natu avà un’antru mudellu à u scalu mundiale, è ùn pare forse tantu vicinu di ciò ch’elli sunniavanu tutti quelli in brama di « libertà ».

Insomma, u sbagliu di sottustimà sti scambi prufondi di u raportu à l’idea di demucrazia, perchè u nostru cuttidianu stà più o menu tranquillu sin’à avà, u fattu di crede è di fà crede chì diritta è manca, « ghjè listessa » o chì « ùn ci entrimu micca », ci ne puderiamu pente un ghjornu.