Sardegna, cusì vicina, cusì luntana...

Tuttu hè partutu da sta publicità. Ci si vede un omu, si pensa ch'ellu hè sardu. Porta un "marcel" biancu è parla cù e mane.

"Vous avez quatre heures pour apprendre à parler avec les mains" dice a pubba.

Difficiule di fà più cliché. Ùn ci sò ch'è ondeci chilòmetri trà e duie isule, 10.000 anni di storia cumuna, a listessa lingua (iè iè u gallurese hè corsu)... ma "l'isula surella" ùn hè mai stata cusì luntana.

Ma perchè, noi altri Corsi, chì suffremu tantu di i stereotipi, chì ci lagnemu tantu è tuttu l'annu di i clichés chì i Francesi ponu avè nant'à noi, semu capaci à sorte un affare cusì ?

Nant'à a e rete, falanu scutrate.

Imaginate appena un'affare di u listessu generu, pè una cumpagnia francese, cù un Corsu rapresentatu di manera grussiera (un maffiosu chì face a siesta cù una castagna ?).

Ci saria digià stata una chjama à manifestà, 40 chjame à u Forum di RCFM, una petizione, quatordeci hasthags differenti, ottanta pagine Facebook per chjamà u boycott è sette cumunicati differenti di a CDC.

Ancu di grazia, ferma a magagna. Subbitu, hè ghjunta a parudia. (pustata nant'à Facebook da Yann Lorec).

Hè ciò chì si chjama un bad buzz.

Un'altra, vista nant'à Facebook (ma avemu dettu basta cù i clichés...)

A bona nutizia in tuttu què ? Forse chì i publicitarii è quelli chì anu validatu sta pubba rifletteranu à duie volte. È forse ch'ellu si viderà menu clichés à l'avvene.

In quant'à a Sardegna, merita megliu è merita 1000 volte d'esse visitata. Ma quessa, ne parleremu un'altra volta...