Salah Abdeslam in Corsica... è altri puttachji più o menu veri

L'omu u più ricircatu d'Auropa in Corsica ? In più di quessa micca in Seat, ma in Audi ?

Hè a voce chì curria dapoi mercuri passatu. U lindumane matina, SMS è missaghji circulavanu nant'à a rete suciale è criscia a psicosa d'un attentatu kamikaze in l'isula. Un ghjornu in più è tuttu ciò chì a Corsica conta di trapanati identitarii eranu pronti à organizà battute è milizie.

Ma in u dopu meziornu, amparavamu in Corse-Matin :

"L'automobiliste, qui avait affirmé l'avoir reconnu à bord d'une voiture immatriculée en Belgique sur la route entre Corte et Aleria, a été interrogé par les gendarmes. Lors de son audition, il aurait déclaré qu'il ne lui était pas possible de reconnaître quelqu'un de nuit et par temps de pluie."

È dop'à un longu apperitivu, hè ancu di più difficiule.

Ma induve si piatta Xavier Dupont de Ligonnès ? U suspettu numeru unu in l'affare di a "tuerie de Nantes" in u 2011 (cinque membri di a listessa famiglia tombi...) ùn hè sempre micca statu trovu.

Un annu dopu, a voce u manda in Bastia, "dans les quartiers nord de la ville" dice Corse-Matin, è ancu à e serate karaoké di u portu di Toga.

À l'estate 89, l'OM è Bernard Tapie volenu fà vene à Diego Maradona in Marseglia. U trasferimentu ùn si ferà mai, ma Bastia si mette à sunnià : per chì Maradona s'abituessi à u campiunatu francese, Tapie u vole imprestà à Bastia per un annu.

Maradona, cù Piotr Rzepka, Philippe Gottardi è Amara Traoré, nant'à i terreni di Gueugnon è di Martigues, cù una maglia "RCI" ? È dì ch'è no avemu mancatu quessa...

In a grande lista di "quelli chì in veru, sò Corsi" truvemu à : Muammar Kadhafi (difatti Preziosi di Vezzani), Nicolas Sarkozy saria u figliolu di l'anzianu merre di Neuilly, Achille de Peretti è u babbu di Patrick Sébastien hè un prete corsu.

Almenu d'un test ADN, ùn a saperemu mai.

Vechju fantasma di a strema diritta francese, di a CFR è di i barbusi, Edmond Simeoni travaglieria di fatti in secretu per l'Americani. Di tantu in tantu, u puttachju torna à sorte.

Paul Giacobbi in quant'à ellu saria raellianu (di quelli di Raël), Camille de Rocca Serra saria un agente di u Mossad, Dumenicu Bucchini di u KGB è Jean-François Baccarelli una spia extraterrestre di una luntana galassia.

Perchè micca ?

In a listessa sterpa ch'è u famosu "Elvis Presley hè sempre vivu è a si sciala nant'à un'isula di u Pacificu", esiste dinù u puttachju "Jim Morrison hà campatu in Corsica".

Peccatu, u puttachju ùn dice micca induve è s'ellu hà datu un colpu di manu à Tino Rossi.

Estate 1997, u Sporting cerca un attaccante. L'annu nanzu, Bastia hà flambatu in campiunatu (finisce settesimu, à trè punti di u terzu). Ghjoca a cuppa Intertoto, chì purterà u club in UEFA.

Tandu, tuttu hè pussibule per Bastia, ancu di vede cù a maglia turchina u grande attaccante nurvegianu di Chelsea. O guasi. Senza internet nè rete suciale, i puttachji si facenu in i caffè di a cità. È tuttu u mondu hà intesu dì chì qualchissia avia vistu à Tore Andre Flo in Puretta, "de source sûre".

In fine di contu, u Sporting arregistrerà e signature di Nenad Jestrovic è di Jean-Jacques Etamé.

Yvan Colonna hà passatu quattru anni à a machja. Durante tuttu stu tempu, a pulizza l'hà circatu in u mondu sanu : à Disneyland, in Africa, à e Caraibe... Una pista di i RG l'hà purtatu à u Venezuela. Cunniscite a fine di a storia.

In Toga, in Furiani, à a piazza di u sinemà "Le Régent" o di l'anziane "Galleries St Roch"... dapoi anni è anni i puttachji anu messu un Mc Do in parechji lochi di Bastia è u so circondu.

Oghje, sempre micca Mc Do, ma u più grande Quick di Francia. Et qui on est ?

Ùn si pudia finisce senza puntu Godwin.