È avà ?

Chì serà l'attitudine di u statu ?
Sta mane u portavoce di u guvernu hà stanghittatu e porte. È s'ellu cuntinuveghja cusì, chì si face ? Chì hè u pianu ?

Chì piazza per l'opposizione ?
I naziunalisti chì sò stati minuritarii durante quaranta anni sanu bè à chì puntu ponu esse disprezzanti quelli chì sò à u putere... A demucrazia hà bisognu d'opposizione, di cunfronti. Serà accettata a critica ? Si puderà ùn esse micca d'accunsentu ?

Chì prugettu di sucetà ?
"Prima l'autonomia. U prugettu di sucetà, si viderà più tardi !" A corsa à u putere hà fattu chì u prugettu di sucetà hè spessu statu più o menu lacatu da cantu in a grande famiglia di i naziunalisti. Ma di pettu à una sucetà chì scambia in furia, à a mundializazione, à l'inegualità chì crescenu trà i più debbuli è quelli chì sanu prufittà di stu sistema, è avà ch'ellu ci vole à pensacci... A pulemica di l'Atrium ci l'hà ramintata.

A cullettività unica ?
A fusione di i cunsigli generali in a cullettiva unica ùn si ferà micca senza pena in capu per l'eletti. Tamantu capatoghju.

È sta povera lingua corsa ?
Ci la ferà a lingua corsa à esse una vera lingua, aduprata, parlata è scritta ? O serà cundannata à una piazza sìmbolica, à ùn esse ch'è una rivendicazione eletturale ?

L'astensione ?
Hè stata forte. In Bastia hè cullata sin'à 65% in certi scagni di Lupinu. Segnu di disincantu, di dillusione... Hè forse quì a sfida maiò chì aspetta a Corsica.

Cumu fà cun elli ?
A settimana scorsa, u giurnale Le Monde ci hà ramintatu chì più ch'è mai, i veri patroni sò elli.

Serà solu una moda u naziunalisimu ?
"Autrefois, les nationalistes faisaient peur. Aujourd’hui, ils sont presque hype !" si pò leghje in Libération. Quale a pò nigà ?

Ma e mode, per definizione, dura un tempu. Allora ?