Quandu s'incontranu pop inglese è messa corsa

In a canzona Warbeth di The Magnetic North u gruppu di Simon Tong, l’anzianu ghitaristu di The Verve hà utilizatu una manata di segonde di u Tantum ergo  arregistratu da L'Ensemble Organum di Marcel Pérès è E Voce di u Cumune di nuvembre 1993.

U manuscrittu di stu Tantum ergo era statu publicatu in u 1649 in Ghjenuva, avia appartenutu à u cunventu d'Alzipratu ed hè statu ritruvatu à a Bibliuteca Pruvinciale Franciscana di Bastia. Eccu a versione integrale di stu cantu :

A li sciacca, nè ? Eccu avale una versione più recente, quella di u gruppu A Cumpagnia in u so discu in cuncertu. Claudiu Bellagamba è Jérôme Casalonga cantavanu digià nant'à a prima versione, incù J.-E. Langiani, J.-P. Lanfranchi è Jackie Micaelli, frà d'altri.

I musicanti di The Magnetic North anu participatu appinuccia à sparte u soft power corsu ma soprattuttu ci anu datu l'occasione di ramintà un magnificu cantu allora da ringrazalli è pè viaghjà appena ver di u Nord, un'altra canzona ricacciata di u so discu Orkney, un omagiu di sale è di ventu à l'arcipelagu Scuzzese di l'isule Orkney (Orcades in francese) cusì luntanu ma cusi vicinu da noi.