L'ultima cacciata d'EDF

Era à l'epica di i grandi discorsi nant'à u "développement durable". Sapete, si parlava di u "Grenelle de l'Environnement" è tandu Jean-Louis Borloo mettia una cruvata verde. Pare ch'ellu era à u seculu passatu.

Era "tendance" di fà quellu chì era primurosu di l'ambiu, facia bè. EDF avia dunque sceltu cum'è slogan publicitariu : "Pour les générations futures, nous développons les énergies de demain"... ùn ridite micca, hè a verità.

Si ne puderia ride, si EDF ùn avia micca sceltu d'impuzzicacci cù una centrale à u fiul pisivu, siguramente ciò ch'ellu si face di peghju pè a salute.

Ùn parlemu mancu di u prezzu di l'elettricità in l'anni à vene, u costu di u petroliu risicherà di flambà torna appena. L'elettricità corsa diventerà forse a più cara di u mondu in più d'esse a più impuzzicante.

A CGT ella hè cuntenta, l'avia digià detta annu chì u fiul era a sola suluzione.

Trà u GALSI chì ùn si ferà, a CTC chì ùn hà u putere di decide, a crisa energètica chì vene, a minaccia di e tagliature d'elettricità di l'inguernu 2005, u puzzicheghju di u fiul, EDF chì si ne impippa di i Corsi, chì hè a suluzione ?

"Le plan énergétique de la Corse, un plan d’économie assistée ?" dicia u blog Corse Durable. Ùn semu ancu à sortecine...