"L'image de la Corse"

I picculi incidenti di u derby anu un meritu : i Francesi sò cuntenti di vede chì i Corsi ùn sò micca cum'è elli è ch'elli sò sempre salvatichi è viulenti. Avemu rassiguratu à Pierre Menès è à Jean-Pierre Chevènvement. Ùn ci hè chè da leghje st'articulu : Ajaccio-Bastia : le scandale du foot corse.

Cinque minuti d'una micro-baruffa trà trenta persone (nant'à 11.000), dui fumìgeni è una bomba agrìcula anu rilanciatu un vechju dibbattitu : "quelle image on va donner de la Corse ?"

Purtantu, in termine di "fiura chè no demu" di u nostru paese, ci hè forse peghju :

• Un paese induve i "voyous" sò rispettati è mai inchietati.

• Un paese induve i malfattori riescenu sempre a so reinserzione prufessiunale dop'à a prigiò.

• Un paese induve certi eletti sò più o menu ligati à i malfattori... è cuntinuveghjanu à esse eletti.

• Un paese induve u soldu hè rè è induve ci vole à mustrà a so riescita à colpi di grossi 4x4.

• Un paese chì abanduneghja i so zitelli : a giuventù corsa hè quella chì hà u più di giovani micca inseriti, senza diplomu è senza travagliu.

• Un paese induve a sola perspettiva ecunomica hè quella di u turìsimu, di l'immubiliare, di vende i so terreni.

• Un paese abbandunatu à i speculatori è à i scrucconi.

• Un paese induve l'obesità di i 5-7 anni hè a più forte di Francia.

• Un paese chì si taglia di e so radighe, di a so lingua, di a so cultura.

• Un paese chì hà vistu più di 500 assassinii in vint'anni.

• Un paese fatalistu : "iè ma chì voli fà, contr'à i voyous ùn si pò fà nunda".

• Un paese chì diventa goffu, cù un paisaghju imbruttatu à colpi di cantieri, di lotissements, di residenze orrìbile è di zone cummerciale chì crescenu in ogni locu.

È averiamu da inchietacci per una bomba agrìcola durante un macciacciu di futbol?

Piuttostu chè d'inchietassi di "l'image qu'on donne aux Français", saria ora d'inchietassi di a fiura di stu paese chè no demu à i nostri figlioli.