Johnny, cantami in corsu !

Pare una burla ma nò, u cantadore preferitu di i francesi di più di 50 anni s'hè messu à u corsu ! A canzona (un "duo") hè esciuta nant'à l'ultimu dischettu di Michel Mallory, Sentimenti, arresgistratu in Corsica. U titulu hè L'amore solu, è per avà ùn aghju pussutu truvà stu pezzu nant'à u net...

Di st'evenimentu ne parlanu sopr'à tuttu i fanàtichi di Johnny nant'à i forum di discussione d'internet. È siguramente chì i numerosi cullezziunadori di tuttu ciò chì tocca à Jean-Philippe Smet u si l'anu da strappà.

È sì sta nutizia face surride in un primu tempu, tantu pare stranu u mischju trà a musica di Johnny Halliday è a canzona corsa, cumu a dice Michel Mallory hè una manera furmidevule di mette in lume a nostra lingua... è perchè micca ?

A prussima tappa : a dumanda di naziunalità corsa di Johnny Halliday ?

In tutti i casi aspettemu vulenteri una canzona in corsu di Madonna, di Bruce Springsteen o di Shakira ! U ghjornu induve TF1 surterà un dischettu "Les plus grands tubes de Jean-Paul Poletti interprétés par la Star'Academy" serà forse u segnu chì a nostra lingua serà preparata à l'assalti di a mundializazione...


È voi, chì ne pensati ? Lasciate puru i vostri cummenti !