Innò, ùn era micca in Biguglia...

Micca sempre faciule di truvà i boni ritratti, ancu pè i giurnalisti. Sì u net pò esse una manera strasordinaria per truvà testimonii nant'à u terrenu (cum'è sta pagina di France 3 Corse cù e cuntribuzioni di l'internauti), pò esse dinù una trappula.

Esempiu cun sta fottò d'illustrazione d'un articulu di Corse-Matin nant'à u tempurale chì hà toccu a regione di Bastia, in l'edizione di u 29 nuvembre :

Per disgrazia, stu ritrattu ùn hè manc'appena statu pigliatu in Corsica, ma in u Var, è in u 2010, cumu u mostra st'articulu di Le Monde :

Serà cusì faciule di fassi intrappulà ?

Ci vole à crede, postu chì u listessu ritrattu si ritrova nant'à parechji siti d'infurmazione... algeriani, cum'è Algerie 360.

Sì i macchettisti di Corse-Matin leghjianu A Piazzetta, l'averianu sappiuta. Noi dinù avemu utilizatu stu ritrattu, ma in a legenda l'avemu detta ch'ellu si passava in u dipartimentu di u Var...

Allora perchè stu sbagliu ? U primu à lancià l'infurmazione chì l'affare si passa in a regione di Bastia si trova nant'à Twitter. Vene da u contu parodicu (hè a moda nant'à internet, cun l'americanu The Onion o u francese Le Gorafi) di... U Gorsmatin.

Cun stu Tweet :

Ma nò, era bè quattru anni fà, à parechji chilòmetri di a Corsica...

Bon d'accordu ùn avemu nunda à dì chì pazzìe n'avemu scrittu ancu nant'à A Piazzetta. È ancu di grazia ch'è no avemu à Corse-Matin, ch'o sinnò ùn esistiamu micca.

Una ghjurnata difficiule è un "bouclage" in l'urgenza sò siguramente à l'orìgine di sta mancata. Ma attenzione o Corse-Matin ! Ùn ci vole micca sempre à crede U Gorsmatin...

Finalmente, Corse-Matin hà fattu una risposta in a so edizione di dumenica. Fair-play, hà ricunnisciutu i so torti :